Dobling i talet på rednings- og leiteaksjonar

Det er svært mange som ferdast i den spektakulære naturen i Møre og Romsdal til alle årstider. Det går bra med dei aller, aller fleste. Men nokre kjem opp i uventa situasjonar og treng hjelp.

Det merkar ikkje minst Røde Kors Hjelpekorps. Dei er svært ofte ute i terrenget for å hjelpe folk som har fått vanskar.

– Dei fleste oppdraga våre er såkalla ambulanseoppdrag utanfor veg, eller henteoppdrag, som utgjer den største auken, seier Trond Inge Larsgård, fagleiar i Møre og Romsdal Røde Kors.

I Kristiansund blei den eldste Røde Kors-avdelinga i Møre og Romsdal feira tysdag kveld. Lokalavdelinga feira at det er 110 år sidan stiftinga.

Og midt i førebuingane til jubileumskvelden måtte fleire av medlemene rykke ut. Måndag gjekk turen til Ålvundfjord der ein 10 år gamal gut var sakna.

– Alt enda heldigvis godt. Vi kunne snu heimover nesten før vi byrja å leite, fortel hjelpekorpsleiar Gunnar Todal.

Leiaren for hjelpekorpset kan også fortelje at det dei seinare åra er blitt lettare å rekruttere medlemer til organisasjonen.

– Talet på medlemer i hjelpekorpsa aukar over heile Møre og Romsdal. Det er ikkje så vanskeleg å få tak i frivillige lenger, seier Todal.

Dette betyr at den store auken i talet på leiteaksjonar ikkje nødvendigvis fører til stor auke i belastninga på kvar einskild medlem.

– Det er svært fint å leie ein organisasjon som Møre og Romsdal Røde Kors. Vi har svært mange engasjerte medlemer. Drivkrafta er berre ei takk for innsatsen og eit smil, seier leiar i Møre og Romsdal Røde Kors, Øystein Valde.

Dei fleste av dei som deltek i rednings- og leiteaksjonane gjennom Røde Kors er frivillige. Det betyr at dei som går ute i terrenget i Røde Kors-uniform til dagleg er i vanleg arbeid eller er går på skule.

– I mange tilfelle blir det litt vanskeleg når dei må spørje seg fri medan arbeidsgjevaren helst ser at dei tilsette blir verande på jobb, seier fagleiar Trond Inge Larsgård.