Difor er dette eitt av dei mest frykta havområda

– Det er klart ein huskar tilbake, seier Nils Kristiansen, som er kaptein på lasteskuta Hagland Captain.

Då Hurtigruteskipet «Kong Harald» fekk motorstans tysdag og det nok ein gong vart sett i verk ein dramatisk redningsaksjon, kom minna tilbake.

Nils Kristiansen veit korleis det er å vere i havsnaud i det området. Den same dagen som cruiseskipet Viking Sky, med over 1300 personar om bord, var meter unna å gå i fjøresteinane i mars 2019, fekk lasteskipet hans også motorstans.

–Mistar du motorkraft over Hustadvika er det alvorleg, seier Kristiansen.

Mange forlis

Havstykket over Hustadvik er rekna for å vere eitt av dei farlegaste i landet og gjennom historia har det skjedd fleire forlis.

Inge Fagerheim er los for Kystverket og lommekjend i området.

Han fortel at havstykket er utfordrande og sjøfolka er ekstra på vakt her. Storhavet står rett inn, samstundes er det mykje holmar og skjer.

– Visst båten mister maskinkraft blir det problem. Du har ikkje eit stort område å drive på før du treff holmar og skjer på begge sider av skipsleia, forklarar Fagerheim.

Kvart minutt tel

Studentane som skal bli skipsførarar øver på motorstans når dei kryssar Hustadvika i simulatoren.

– Ein blir litt stressa, men det er difor vi øver så mykje som vi gjer. Det skal ikkje vere så mykje tenking, men mest handling når du først er i situasjonen, seier Peter Ludvig Flatmark.

Norvald Kjerstad ved NTNU i Ålesund seier at den korte vegen til fjøresteinane kan bli dramatisk.

– I havet kan ein få motorstans og tillate seg å drive nokre timar utan at det får konsekvensar, men på Hustadvika tel kvart minutt, ifylgje Kjerstad.

Han prisar seg lukkeleg ovet at ankeret på hurtigruteskipet heldt.

– Ankeret er den tryggleiken ein har tilgjengeleg i slike situasjonar. Denne gongen såg det ut til å fungere slik det er tenkt, i motsetning til Viking Sky. Då heldt ikkje ankeret og situasjonen var atskilleg verre, seier Kjerstad.

Tankane kjem i uvêr

Sidan den dramatiske redningsaksjonen då Nils Kristiansen og mannskapet på lasteskipet blei berga av eit helikopter i 2019, har han passert Hustadvika mange gongar. Det er rutine og han er ikkje redd.

– Å vere sjømann handlar om å ta dei rette vala. Vi lukkast som regel, seier Kristiansen.

Men han innrømmer at å passere Hustadvika i dårleg vêr gjer han ekstra merksam.

– Eg tenker på det når vêret er dårleg. Då er du ikkje heilt komfortabel i situasjonen, seier Kristiansen.