Bubil-gigantar slår seg saman og blir størst i landet

Kjedene Tellus og Ferda har sendt søknad om samanslåing til Konkurransetilsynet, som har 25 dagar på seg til å seie ja eller nei til fusjonsplanane.

– Det har vore ei stor endring i marknaden. Fram til 2018 var det ein kontinuerleg auke i salet av nye bubilar. Etter dette har marknaden halvert seg, seier konsernsjef i Ferda, Leif Terje Hansen.

Bubilboom i Noreg

Perioden 2009 til og med 2019 representerte ein eventyrleg vekst i denne delen av fritidsbransjen, med nesten ei dobling i talet på bilar. Og ved inngangen til koronaåret 2020 var det rekordmange norskregistrerte bubilar på vegane.

Frå 26800 bubilar i 2009 var talet kome opp i 52 000 i 2020, ifølgje Statistisk sentralbyrå.

Tre år seinare ser biletet heilt annleis ut. Salet gjekk ned, og det blei bråstopp då kronekursen svekka seg og renta skaut oppover i 2021.

Nedgang i privatøkonomien

I 2021 var den gjennomsnittlege styringsrenta på 0,08 prosent. I november i år er renta på 4,25 prosent. Høg rente er truleg ei av hovudårsakene til at salet av bubilar og campingvogner har gått ned.

– Vi trur det er ein tydeleg samanheng her. Når det gjeld campingvogn så er dette ofte litt yngre folk enn dei som kjøper bubil. Vi er ganske sikre på at denne kundegruppa er råka av svekka kjøpekraft, seier konsernsjefen i Ferda.

– Når det gjeld bubil er kundane ofte litt eldre, og mange har blitt gjeldfrie. Likevel trur vi at mange av desse også vel å vere litt forsiktigare, seier han.

– Tenkjer seg om to gongar

Forbrukarøkonom Derya Incedursun i Nordea er ikkje i tvil om at dagens rente og kronekurs er med på å dempe etterspurnaden etter både bubilar og campingvogner.

– Når renta aukar og kronekursen er svak så påverkar dette forbruket av dyre fritidsvarer som bubilar og campingvogner i stor grad. Høgare rente betyr jo auka kostnader om kjøpet er finansiert med lån. Dette gjer at forbrukarane tenkjer seg om to gongar, seier Incedursun.

– Men det ser ut som om også eldre folk, med nedbetalt lån, er blitt forsiktigare?

– Ja, eldre med nedbetalte lån kan bli påverka av høgare rente, men på ein annan måte enn dei med stor gjeld. Høge renter kan skape usikkerheit, noko som kan gjere dei forsiktige med store kjøp, seier forbrukarøkonomen.

Ifølgje Incedursun påverkar det høge rentenivået også ei rekkje andre pengekrevjande område i fritidsmarknaden. Når kjøp av fritidsbustader og reiser har blitt dyrare, vel folk å utsetje slike kjøp og å kutte ned på reisebudsjetta sine.

Store varelager og lågare omsetnad

Salstala for 2023 er naturleg nok ikkje klare enno. Men varelagera av både nye og brukte bubilar og campingvogner skal vere store.

Og førebelse anslag viser at omsetnaden dette året ligg an til å hamne på 40 prosent av omsetnaden i toppåret 2018.

– Trenden med store varelager forsterka seg under pandemien. Det blei trøbbel i produksjonslinjene. Det blei ustabile leveringstider. For å vere sikker på å ha nok bilar så har nok heile bransjen har nok bestilt for mykje bilar og vogner mens ein ventar på at marknaden skulle snu, seier Hansen i Ferda.

For tidleg å varsle endringar

Hansen presiserer at det som har skjedd er at Tellus og Ferda har sendt inn søknad om å slå saman dei to kjedene. Konkurransetilsynet har frå søknadsdatoen 25 dagar på seg på å seie ja eller nei til søknaden.

– Kundane vil ha fordel av å ha ein kjede som har avdelingar over store deler av landet. Den nye Ferda-kjeda vil også ha eit større utval av bubilar og vogner.

– Vi har sett at bubilkjeder allereie har slått saman avdelingar der det har vore kort veg mellom dei. Blir det nedlegging av avdelingar som følgje av denne fusjonen?

– Det er alt for tidleg å seie noko om. Saka ligg framleis til behandling hos Konkurransetilsynet og Tellus og Ferda er framleis konkurrentar. Vi kan ikkje ta ei einaste avgjerd på dette no, seier Hansen.