Ifølgje 110-sentralen var huset tomt, og huseigaren ute og reiste, då dei fekk melding om brannen frå einebustaden i Grebstadlia i Sykkylven. Både helsevesenet, politi og brannvesenet rykte ut til det tomme huset.
– Det ser ut som brannen er sløkt, opplyste NRK-reporter Ivar Eidheim klokka 22.
Då hadde brannmannskapet jobba iherdig nokre minutt etter å ha fått melding om brannen like før klokka 21.30.
– Dei jobbar iherdig med å få tak på det, sa operatør Brian Morrison ved 110-sentralen til NRK om sløkkingsarbeidet.
Klokka 22.22 melde politiet at brannen var under kontroll og at det blir arbeidd med å redde verdiar frå staden. Brannårsaka er ukjent.
Skal ikkje vere fare for spreiing
Det næraste huset skal ligge omlag 20 meter unna, og ifølgje 110-sentralen var det ikkje fare for spreiing.
– Dei har grei kontroll på det utvendige no, og jobbar både innvendig og utvending med brannen, sa Morrison like før klokka 22.
– Høgg seg gjennom veggane
NRK-reporter Ivar Eidheim var på staden fredag kveld og fortalde at brannvesenet var i gang med sløkking.
– Dei driv og høgg seg gjennom veggane for å kome til, det brenn inne i takkonstruksjonen, og vi ser flammar, sa NRK-reporter Ivar Eidheim like etter klokka 21.30.
Ifølgje 110-sentralen var det allereie synlege flammar og røyk frå den eine gavlveggen då dei kom fram til einebustaden.