Bussjåførane kallar den kommunale Vikvegen for ein kjerreveg. Dei meiner det er så ille at dei vil nekte å køyre der.
Det er ei kjent problemstilling over heile landet. Vegar som forfell.
For bussjåførane som skal frakte skulebarn og andre trygt fram er Vikvegen ein utfordrande arbeidsplass.
– Her er det fullt av gliper, holer, humpar og dumpar, seier Knut Stian Eik når han viser NRK korleis det ser ut.
Engasjerte tomrefjordingar går rundt og studerer glipene i vegen.
– Telehiv er naturleg. Men når utgangspunktet er så dårleg som dette, må noko gjerast, seier Jan Olav Vadseth.
– Bilane blir øydelagde
Vegutfordringane må så snart som råd på sakskartet i kommunen, meiner Framstegspartiet.
– Bilane til folk blir øydelagde. Fjørene ryk, seier Sissel Vik Vasseli. Ho sit i kommunestyret for Frp.
Kommuneleiinga seier dei forstår frustrasjonen, men at dei ikkje vil drive med vegplanlegging midt i den verste telehiv-perioden.
Ingen forslag om meir pengar
– Ingen parti foreslo ekstra vegpengar i budsjettet, seier Høgre-ordførar Randi Bergundhaugen.
– Det å drive fakkeltogdemokrati er enkelt, men kanskje ikkje det beste for heilskapen, uttaler ordføraren til NRK.
Senterleiar Terje Hoel i NAF i Ålesund meiner det er dårlege vegar mange stader.
I jobben sin ser han dagleg at dårleg vegstandard går utover bilane.
– Det er på tide at nokon vaknar, seier han.
På Vikvegen i Tomrefjord ser bussjåføren på klokka. Han er redd for at han ikkje skal rekke ferja.
– Vi må få betre veg. Det kan ikkje halde fram slik, seier Knut Stian Eik.