Klokka 20:10 opplyste operasjonsleiar Ole Bjørn Harang i Sunnmøre politidistrikt at det ikkje lenger var fare for bustadane på Sandsøya, og at brannen er sterkt redusert.
Ordførar i Sande kommune, Dag Vaagen, seier at alt er sløkt.
– Det siste no er at alt er sløkt og at brannmannskapet trekkjer ned frå fjellet. Det var fem stader med opne flammar som vi sette innsatsen på, seier ordføraren til NRK.
Passe på utover natta
Vaagen seier at arbeidet med å sikre brannen vart gjort på forholdsvis kort tid, men brannvesenet vil halde fram beredskapen fram mot natta.
– Brannmannskapet har gjort ein kjempejobb. Og dei vil vere klare i tilfelle brannen skulle blusse opp igjen, seier ordføraren.
Han seier at slike situasjonar kan kjapt forandre seg, og det kan lett kan begynne å brenne igjen.
Brannen starta veldig nær busetnad, men heldigvis gjekk vinden motsett veg etter kvart.