Også i dag vart den undersjøiske tunnelen mellom Ålesund og Ellingsøya stengt. Denne gongen hadde bilføraren for lite drivstoff til å kome seg opp dei bratte bakkane.
– Det er klart at når dette skjer både ein og to gongar for dag, brukar politiet mykje ressursar som vi kunne brukt andre stader, seier Johan Arnt Overøye. Han er operasjonsleiar ved Sunnmøre politidistrikt.
Fleire stader i tunnelen er det så uoversiktleg at politiet må stenge tunnelen dersom bilane får motorstans. Det skaper spesielt stor frustrasjon for folk som skal til flyplassen, merkar Overøye.
Tom tank
Møre Bilberging hentar mange av bilane som stansar i tunnelane. Dagleg leiar Geir Andersen trur auka trafikk er grunnen til at det nesten dagleg må bergast bilar derifrå.
– Folk tenkjer vel ikkje på at bilen brukar mykje drivstoff i dei bratte motbakkane. Dersom det er lite på tanken, vert det ofte liggande i eine enden og bilen stoppar, seier Andersen.
Manglande vedlikehald
Typisk er det også at eldre bilar får motorhavari. Andersen meiner at mange av bilane som stansar i tunnelen manglar vedlikehald, og dermed får problem i motbakkane. Det er også opplevinga til politiet.
– Svært mange av bilane har problem med kløtsjen, seier Overøye. Politiet bøtelegg likevel ikkje dei som får motorstans på grunn av lite drivstoff eller dårleg vedlikehald på bilen.