Jenta vart først lagt inn på sjukehuset i Ålesund, der det vart påvist at ho er smitta av ein alvorleg E.coli-variant, skriv smp.no. Denne veka vart barnet overført til St. Olavs Hospital i Trondheim.
Smittevernlege i Sula, Silje Elisabeth Hagen, seier til Sunnmørsposten at jenta har hatt eit alvorleg sjukdomsforløp, men at tilstanden no er stabil.
Foreldra er varsla
Kommunalsjef i Sula, Anne Grete Skjærseth, seier til NRK at ho vart varsla om saka torsdag kveld. Fredag sende kommunen ut informasjonsskriv til alle barnehagane i kommunen, med råd til foreldra.
– Det er eitt barn som har blitt sjuk, og hadde smitten kome frå barnehagen, trur vi at fleire barn hadde blitt smitta, seier Skjærseth.
LES OGSÅ:
Veit ikkje var smitten kjem frå
Mattilsynet har tatt prøver både i barnehagen, heime hos barnet og andre stader det kan vere tenkeleg at smitten kjem frå. Skjærseth seier at desse prøvesvara truleg vil kome på måndag.
– No er det aller viktigaste å finne ut kvar smitten kjem frå, seier kommunalsjefen.
Intervjuar familien
Distriktssjef i Mattilsynet, Kristin Ness, seier at dei fekk førespurnad frå kommuneoverlegen og Folkehelseinstituttet om å bidra i saka.
– I tillegg til å ta prøver av matvarer, gjennomfører vi også intervju med foreldre, besteforeldre og barnehagetilsette for å finne ut kva barnet har ete, seier Ness.
