NRK Meny

Sommarkveld i januar

Sosiale medium fløymer over av vakre solnedgangar i kveld. Mange har vore ute og kosa seg sidan temperaturen er som på ein god sommarkveld – og i Molde har det vore badeliv.

Bading i Molde 26. januar

BADELIV: Det har vore like varmt som ein god vestnorsk sommardag i Møre og Romsdal i dag.

Foto: Rob Buist

Rob Buist kjem frå Nederland, men har budd i Malmefjorden med kone og to barn sidan 2015. Han tok med barna til Molde for å nyte fineveret i dag, då han tok blinkskotet av mannen som tek seg eit januarbad.

– Vi har ikkje så mykje sol på Lindset i Malmefjorden i januar, så vi reiste til Fannestranda. Der var folk som grilla, og vi oppdaga to gutar i badetøy på stupebrettet. Sola skein over stranda, og det var nesten som ein fin sommardag – bortsett frå at sola gjekk ned klokka 15.45, då, seier han

Inspirert

Rob Buist seier han er inspirert av sjåarbilda til NRK Møre og Romsdal, og han er difor ofte ute for å gå tur og ta bilete.

– Eg såg situasjonen med stupet komme, og fann ein fin posisjon. Akkurat når han stupte kom ein båt, og det blei eit veldig vakkert bilde, seier han nøgd.

Og mange var ute for å ta bilde i kveld. Ein av dei er som har foreviga sola si ferd mot havet i kveld, er Otto Norhagen.

– Det er heilt spesielt at temperaturen er så høg på denne årstida, og det var eit heilt spesielt lysskjer på himmelen i kveld.

Varmluft frå sør

Vakthavande meteorolog ved Meteorologisk institutt, Jon Austerheim prøver å forklare kvifor solnedgangen var ekstra fin i kveld.

– For det første har de fint ver og lite skyer i Møre og Romsdal. Og så er det varmluft som kjem frå sør. Denne lufta kan vere fuktig og disig, og då kjem lyset og fargane godt fram, forklarar han.

Ikkje rekord

Det har også vore veldig varmt i Møre og Romsdal i dag, men rekord er det ikkje snakk om.

– Maksimumstemperaturen i Møre og Romsdal i dag var på 15,7 på Sunndalsøra i dag, seier Austerheim.

– Kan vi berre gløyme vinteren?

– Nei, det kan de nok ikkje. Det skiftar fort og det snør godt i Møre og Romsdal når det kjem vind frå nordvest, men dei næraste dagane er det sørleg vindretning og mildt. På søndag kjem det eit blaff av kald luft, men så blir det mildt igjen utover veka.

Varmen lokka fram hoggorm

Huggorm på Otrøya, 26. januar 2017
Foto: Mariann Hagen

På Otrøya i ytre Romsdal fanga Mariann Hagen denne hoggormen med kamera torsdag kveld. Ormen ligg vanlegvis i dvale frå september-oktober månad. På varme plassar på vestlandet brukar dvalen å vare fram til slutten av februar, men sola lokka altså ormen ut på tur på Otrøya torsdag kveld.

Her kan du halde deg oppdatert på vêret.

Siste video/lyd

Mange geitebønder i landet vil ha den elektriske geiteklaven til Gjemnesbedrifta Nofence. Produksjonen pågår for fullt, men geiteklaven er enno ikkje godkjend. Gründerbedrifta treng beitesesongen 2017 for å gi Mattilsynet dokumentasjonen dei krev.
Dei fleste har meir enn nok med å SJÅ utfor kanten på den hundre meter høge Zakariasdammen i Tafjorden på Sunnmøre.
Men det finst folk som vil betale for å få seg ein luftig tur. Og frå neste veke av kan dei gjere akkurat dét...
Fiskesperra som skal redde den nasjonale lakseelva Driva, blir slakta av ekspertar på behandling av gyrosmitte. Miljødirektoratet er ansvarleg for prosjektet til seksti millionar kroner. Dei meiner det trengst berre små justeringar.