Ulykka skjedde på fylkesveg 64, mellom kommunane Hustadvika og Averøy.
Operasjonsleiar Ragnvald Rasmussen i politiet i Møre og Romsdal seier dei fekk melding om ulykka klokka 23.11, då ein annan bilist kom køyrande forbi.
Ulykka har skjedd i forkant av dette.
Alle naudetatane rykte ut til staden. Det var berre ein bil som var involvert. Denne hadde køyrt i fjellveggen.
– Det var éin person i bilen. Ulykka verkar å vere alvorleg, sa operasjonsleiar Ragnvald Rasmussen seint måndag kveld.
Tysdag morgon blir det stadfesta at det var ei dødsulykke.
Ein mann i 40-åra frå regionen omkom. Pårørande er varsla.
Har gjort undersøkingar
Ulykkesgruppa til Vegvesenet og krimteknikarar frå politiet har gjort undersøkingar på staden i natt.
– Dei har avslutta sitt arbeid, seier operasjonsleiar tysdag morgon, Erik Daniel Dyb.
Vegen opna igjen rett før klokka 06.00 då bergingsarbeidet var avslutta.
Då hadde vegen vore stengd i nærare sju timar.
Det er så langt uklart kva som er årsaka til ulykka og politiet har sett i gang ei etterforsking av saka.
