AaFK- AZ Alkmaar 2-1

Kampen er slutt: 2-1 til AaFK. Spørsmålet er om det er godt nok til avansement. Kjell Rune Sellin hadde eit par gode halvsjansar på overtid.

90 min: På overtid no. Lagt til tre minutt !

81.min: AaFK veit det hadde gjort seg med eit mål til og set inn på Kjell Rune Sellin i staden for Magnus Sylling Olsen. Friske bein dei siste minutta kan vere lurt når dei nederlandske forsvarsspelarane vert slitne.

77.min: AaFk treng nok eit mål til for å ha eit godt utgangspunkt før returen, men har imponert likevel. Tangotrøyene seglar opp som det store cuplaget i norsk fotball i år med semifinale i NM og sterke prestasjonar i Europa.

73.min: 2-1 ! Barrantes igjen ! AaFk sin elegante midtbanesjef får eit innlegg frå høgre og på meisterleg vis greier han å score frå rundt 15 meter. Utsøkt scoring av tomålsscorar Michael Barrantes !

70.min: Stor sjanse for Alkmaar. Eit frispark går i tverrliggaren. AaFK-keeperen ser ut til å vere plaga av den låge kveldssola.

67.min:Mykje duellar på bana. Publikum ikkje alltid like einige i alt den sveitsiske dommaren gjer. Alkmaar tek ut målscorar Martens og set inn på Erik Falkenburg.

51.min: Gult kort til Jason Morrison (AaFK).

46.min: Då er det klart for 2.omgang. Solomon Okoronkwo har kome inn for dei oransje. Christian Myklebust har gått ut. 5646 tilskodarar i kveld opplyser speaker.

PAUSE: 1-1

43.min: Alkmaar med eit par hjørnespark mot slutten av omgangen. Det eine fører nesten til mål, men Grytebust får kontroll.

35.min:Alkmaar er som venta sikre med ballen i beina, og verkar farlegare etter scoringa. AaFK kjempar godt, men kampen står og bikkar litt no. AaFK treng eit mål til før pause.

30.min: Nederlendarane utliknar på den første sjansen dei har ved Martens. Gudmundsson skyt frå langt hald rett på keeper Grytebust som boksar ballen rett ut til Martens som headar sikkert i mål frå 7-8 meter.

19.min: AaFK har blod på tann no. Pressar på, og har blant anna to gode hjørnespark og ein stor sjanse når Phillips headar frå kort hald, men keeper reddar fint.

12.min: Straffe til AaFK etter hands. Michael Barrantes set ballen midt i mål med stor kraft ! 1-0 til AaFK

2.min: Alkmaar opnar offensivt blant anna med to hjørnespark. AaFK verkar litt nervøse.

0 min: Strålande solskin i Ålesund når kampen startar. Alkmaar har imponert på trening før kampen. Mange trufaste AaFK-patriotar såg nederlendarane i aksjon på treningsfeltet, og vart imponert.

AaFK reknar med rundt 6000 tilskodarar i kveld. Klubbdirektør Henrik Hoff hadde håpt på rundt 8000.

AaFK har Sten Grytebust i mål med Enar Jääger og Jo Nymo Matland på backane. Jonathan Tollås Nation og Daniel Arnefjord i midtforsvaret.

På midtbana finn vi Fredrik Carlsen, Jason Morrison og Michael Barrantes.

Offensivt køyrer AaFK med Demar Phillips, Christian Myklebust og Magnus Sylling Olsen.

På benken: Jonas Sandqvist, Ville Jalasto, Sander Post, Kjell Rune Sellin, Fredrik Ulvestad, Lars Fuhre og Solomon Okoronkwo.