Tysdag ettermiddag skjedde det igjen. Ei av dei største øyane i Noreg, Smøla, var heilt isolert. Ferja er livsnerven til dette øysamfunnet. Men ferja fekk tekniske problem og var ute av drift i over fire timar. Dette kjem på toppen av liknande tilfelle i store samband langs kysten.
– Eg orkar ikkje å halde på med dette lenger. No må dette på plass, så no får ein eller annan kome og rydde opp, seier leiar i samferdsleutvalet i Møre og Romsdal, Frank Sve (Frp).
•
Fylka tok over riksvegane
Frå nyttår tok fylka over store deler av riksvegane i Noreg. I denne overføringa frå Staten ligg også ansvaret for riksvegferjene på desse strekningane.
– Dette er forferdeleg. Vi snakkar om å ha teke over «Svarte-Per». I Møre og Romsdal har fylket teke over 22 ferjestrekningar. Vi har teke over eit ekstremt problem, seier Frank Sve.
•
•
Sinte over ferjekaos
Samferdselspolitikarane i Møre og Romsdal er no sinte på grunn av ferjekaoset. Dei krev at det blir sett inn reserveferjer når dei faste ferjene er ute av drift. mangel på reserveferjer har ført til lange køar og full stans i trafikken fleire stader. Samferdslesjef Arild Fuglseth vedgår at situasjonen er alvorleg.
– Akkurat no er dette veldig alvorleg. I Møre og Romsdal har vi fem reserveferjer. Og no er desse reserveferjene ute på grunn av at fleire ferjer er på vanleg vedlikehald. Når vi då i tillegg får vanskar med reserveferjene har vi kome i ein vanskeleg situasjon, seier Fuglseth.
•
•
•
– Fjord1 har omdømmeproblem
Det var Fjord1 som fekk smake pisken under samferdselsutvalsmøtet i Møre og Romsdal tysdag. Fleire av politiarane kom med knallhard kritikk mot reiarlaget. Ivar Betten (Ap) meiner det er skapt eit omdømmeproblem.
– Eg meiner Fjord1 MRF er i ferd med å misse omdømmet. Fjord1 MRF tek ikkje naudsynt ansvar. Dei skuvar ansvaret over på oss politikarane. Dei slår berre ut med armane og krev meir pengar, seier Betten.