Det er omfattande utbetringar som må til for å hindre at bygningane på Ålesund sjukehus ikkje får ytterlegare skadar. 13.400 kvadratmeter fasadeareal må skiftast og vindauge og solskjerming må bytast ut.
– Berekonstruksjonane bak fasadeplatene har losna. Bygningsarbeidarane kunne ta ein penn og trykke han inn i berekonstruksjonen, sa administrerande direktør Espen Remme då han orienterte styret onsdag.
– Konstruksjonsfeil
Remme presiserte at det er ein konstruksjonsfeil som har ført til dei omfattande ròteskadane.
– Roten skuldast ikkje manglande vedlikehald. På 70-talet la dei treverket direkte i betongen. Så har det kome inn fukt som har fått renne inn mot vindauga, forklarte Remme.
For å hindre at det skal kome fleire fasadeplater fykande i vinden er deler av fasaden allereie strippa for plater. Det har ført til at betongen no står naken mot ver og vind.
– Betongen er prima. Men han kan ikkje stå naken mot ver og vind ein heil vinter til. Tidsfaktoren er ikkje uvesentleg, sa Remme.
– Store kostnader
No skal styret i Helse Møre og Romsdal ta endeleg stilling til saka i oktober. Prosjektet blir delt inn i tre byggetrinn som kvar kostar mellom 80 og 95 millionar kroner. Under styremøtet kom det fram ei viss uro for om kostnadene kan bli større enn planlagt.
– Sannsynlegheita for at dette blir dyrare er stor. Det er ofte slik når ein byrjar å grave i slikt, sa styrerepresentant Kirsti Slotsvik under møtet.
Administrerande direktør Espen Remme sa at det er gjennomført eit omfattande arbeid for å undersøke skadane og at kostnadsvurderingane byggjer på dette arbeidet.
I tillegg til utbetringa av fasaden skal også straumforsyninga ved sjukehuset byggast om. Straumforsyninga er i dag ikkje i tråd med forskriftene.
– Det er kritisk i forhold til drifta og må takast når vi først arbeider med fasaden, sa Remme.
Dette arbeidet er kostnadsrekna til 22 millionar kroner i elektronikk og 13 millionar kroner på byggteknikk. Ikkje noko av dette er pengar som ligg inne i langtidsbudsjetta. Administrasjonen foreslår å søke Helse Midt-Noreg om eit lån på 85 millionar kroner i første omgang.