Brannvesenet vart varsla etter at papegøye-eigaren såg kjæledyret forsvinne ned i støvsugar-magen. Då brannvesenet i den engelske byen Weston-super-Mare kom til huset, sto eigaren med støvsugarslangen i handa. Ut av slangen stakk halefjøra til Beaky.
Helen Gooding let vanlegvis Beaky fly fritt omkring i huset – òg når ho gjer reint. Det angrar ho på i dag.
Beaky ville utforske støvsugaren
Pete Stobart, som er brannmeister i Avon Fire Service, fortalde om den mirakuløse redninga til den lokale engelske avisa.
Henry Turbocare Vacuum Cleaner (HVR 204P). Illustrasjonsfoto
– Beaky flaug omkring inne i huset medan fru Gooding gjorde reint, fortel han. Etter at ho hadde fjerna munnstykket på støvsugaren for å kome til under sofaen, vart Beaky plutseleg interessert.
Svusj...
Beaky bestemte seg nemleg for å utforske den merkelege maskina, og ville byrje med munnstykket. Det var ikkje så lurt å hakke på sugeopninga, for – svusj – så forsvann heile Beaky inn i slangen.
– Fru Gooding slo av støvsugaren så fort ho kunne, og i panikk ringde ho til oss, fortel brannmeister Stobart.
Ikkje trena i å redde papegøyer
Brannvesenet rykte ut. Ikkje mindre enn fem brannmenn måtte til for å redde Beaky.
– Brannfolka våre er ikkje trena i å få papwgøyar ut av støvsugarar, men dei klarte jobben bra, forklarar Stobart.
Til slutt klarte dei å lirke ut fuglen.
Dratt ut etter halefjøra
– Ein av brannmenna tok forsiktig tak i halefjøra medan dei andre bytta på å blåse i den andre enden av røyret, held Stobart fram.
Etter forsiktig draging og hard blåsing, ploppa Beaky plutseleg ut.
Beaky kom frå hendinga utan synlege skader, sjølv om han var lett støvsugd. No slappar han av, og arbeider med å kome seg til hektene igjen.
– Beaky kjem nok ikkje til å gå til åtak på fleire støvsugarar i framtida, meiner Stobart. Vi trudde nesten ikkje at vi skulle klare å redde han, men det gjekk jo bra til slutt.
Notorisk krigs-papegøye
Helen Gooding, eigaren til Beaky, fortel at det ikkje er fyrste gongen Beaky kranglar med inventar og utstyr i huset.
– Beaky går ofte til åtak på støvsugaren, og han har krangla med datamaskina fleire gongar, fortel ho.
– Han er no eigentleg ein liten raring. Her om dagen falt han av skrivepulten min etter at han hakka laus på harddisken. Han trefte visst knappen på cd-spelaren, og så kom skuffa ut og dytta han ned.