– Vi har gjort feil. Det skal ikkje skje igjen, seier vegdirektør Ingrid Dahl Hovland.
- Les meir om kva som skjedde den 15. august 2022, då den ti år gamle fagverksbrua i tre, Tretten bru, kollapsa.
Fredag la Statens vegvesen fram ein rapport om brukollapsen på Tretten i august 2022. Det er konsulentselskapet PwC som står bak rapporten.
– Eg tek ansvar for det som har skjedd. Men endå viktigare er det at eg tar ansvar for dagens situasjon og korleis vi rustar oss for framtida, seier vegdirektøren.
No sett dei i verk fleire tiltak for å følgje opp dei feil og manglane som kom fram.
Gjer fleire tiltak
Mellom anna vil dei no gå gjennom organisering, roller, ansvar og regelverk når det gjeld kontroll og godkjenning av bruer.
Dei vil også gjennomføre ei kompetanseheving når det gjeld forvaltning og vedlikehald av trebruer.
– Oppfølginga har høgste prioritet, seier Hovland.
- Sjå video frå då sjåføren i lastebilen på Tretten vart heisa vekk med helikopter.
Brukte gamle reglar
Då Tretten bru vart planlagt, var det i ei overgangsperiode mellom gammalt og nytt regelverk.
Det var lov å bruke begge, og dei valde å bruke det gamle regelverket då dei bygde Tretten bru.
Ifølge VG har Vegvesenet sjølv innrømma at dei visste at brua ikkje kunne ha blitt bygd som planlagt om dei skulle lagt det nye regelverket til grunn.
PwC meiner bruken av gammalt regelverk gjorde at dei statiske utrekningane ikkje varetok minstekrava til dimensjoneringa av knutepunkta.
Om ein hadde bygd brua etter det nye regelverket, ville ikkje brua ha kollapsa, ifølgje rapporten.
Kritisk til manglande oppfølging
Det var Statens vegvesen som bygde brua, men Innlandet fylkeskommune har eigd og halde ved like brua sidan 2020.
Tretten bru var av same type som Perkolo bru ved Sjoa som kollapsa i 2016.
I etterkant av brukollapsen ved Sjoa, vart Tretten bru grundig undersøkt.
Det var då det vart tilrådd å forsterke knutepunkta på brua, utan at det vart gjort.
Rapporten som vart lagt fram fredag, er også kritiske til Vegvesenets oppfølging etter kollapsen av Perkolo bru i 2016.
I 2016 vart det funne store overskridingar på Tretten bru og Vegvesenet vart anbefalt å forsterke konstruksjonen fleire stader.
Dei største overskridingane i Tretten bru var på 211 prosent, ifølge Stig Rune Johnsen i PwC.
I rapporten kjem det fram at Statens vegvesen ikkje hadde noko system for å følgje opp uavklarte risikoforhold.
– Det var ingen som tok ansvar for å avklare kva risikoen betydde, står det i rapporten.
PwC peiker også på at Vegvesenet mangla eit tilstrekkeleg system for bruforvaltning og for å fordele ansvaret for den vidare oppfølginga.
Kven tek rekninga?
Det er anslått at brukollapsen kjem til å koste minst 300 millionar kroner. Men kven som tek rekninga er uvisst.
Statens vegvesen seier at dei tek det juridiske ansvaret, men når det kjem til det økonomiske, svarar vegdirektøren dette:
– Vi viser til departementet som har dei samtalene og direkte oppfølging ut mot fylkeskommunen i Innlandet, seier Hovland.
Forbyr bygging
Etter at brua over Gudbrandsdalslågen fall saman i 2022, stengde Statens vegvesen 14 trebruer av same type.
Fire av desse bruene er opna for vanleg trafikk igjen. Sju bruer er opne for redusert trafikk, medan tre framleis er stengt, ifølgje ei oversikt frå Statens vegvesen.
I august i fjor bestemte Statens vegvesen at dei forbyr bygging av slike bruer.