– Det er relativt mykje ulovleg fiske med garn, men det blir også fiska mykje i fredningssoner. Me ønsker å få stopp på dette, seier Gry Walle, fiskeforvaltar hjå Fylkesmannen i Hordaland.
– Kaotiske tilstandar
Etter at 36.000 laks rømde frå Linga laks sitt anlegg ved Varaldsøy i mai, er Hardangerfjorden full av fisk, rapporterer grunneigarar.
– Situasjonen er rimeleg kaotisk og uoversiktleg. Det er enorme mengder med fisk i heile fjorden, seier Arild Alvsåker, formann i Norheimsund og Steinsdalen grunneigarlag.
- LES ÓG:
Oppdrettsfisken må vekk for å verna om villfisken. Det paradoksale er at den mest effektive fiskemetoden tilgjengeleg for folk flest, garn, ikkje er lovleg: Med garn tar ein óg mykje villaks og sjøaure.
Dårleg bestand
– Folk må ta omsyn til villfisken, aure og villaks. Det er ein grunn til at det er så strenge reguleringar. Bestanden av sjøaure i Hardangerfjorden er dårleg, spesielt i midtre Hardangerfjorden. Derfor er det ikkje bra at dei tar ut så mykje sjøaure i garn, seier Walle.
Fylkesmannen har fått mange rapportar om ulovleg garnfiske.
– Nokre kjenner ikkje reglane. Andre vil berre fiska, seier Walle.
– Me prøver å informera det vi kan, og vi ber Statens naturoppsyn om å intensivera oppsynet deira for å hindra ulovleg fiske.
Fylkesmannen har send melding til politiet.
– Så får me sjå kva dei kan gjera. Me får håpa at folk er lovlydige, seier Walle.
Vi har mottatt skrivet frå Fylkesmannen, og vi vurderer å melda folk. Det bør gjerne skiltast betre, seier lensmann Terje Sperrevik i Kvam