Men ordførar Leiv Rygg understrekar at det er lang veg fram til ei samanslåing med naboen i sør.
– Saka skal behandlast i kommunestyret. Eg er usikker på om det er fleirtal for dette der. Det blir spennande å sjå. Det er jo heller ikkje sikkert at Evje og Hornnes ynskjer ei slik samanslåing, seier han til NRK.
– Eit absolutt krav
I vedtaket som er gjort vert det sett som betingelse at sentraladminstrasjonen i ein ny storkommune skal ligge på Byglandsfjord.
– No snakkar eg for meg sjølv, men for meg er det eit absolutt krav om vi skal slå oss saman, seier Rygg.
I tillegg krev formannskapet i Bygland ei god fordeling av arbeidsplassane.
Ordførar i Evje og Hornnes, Bjørn Ropstad, meiner vedtaket i Bygland er positivt.
Ropstad er positiv
– Det er veldig positivt at dei har hatt ein god diskusjon. Vi skal ha ein diskusjon i vårt formannskap til veka, men dette verkar veldig positivt, seier han.
– Kva med betingelsen om å legge administrasjonen i Byglandsfjord?
– Det er eit spennande utspel og ein spennande tanke i forhold til å tenke heilheit. Det er det som skal skje, vi skal byggje ein ny kommune. Så må utgreiing og arbeidet som skal gjerast vise om det er riktig å gjere det slik, men eg tykkjer det er eit flott utspel, seier Ropstad.
Ei samanslåing vil gje i underkant av 5000 innbyggjarar i den nye kommunen.