– Planta kan gje oss store utfordringar, seier ein bekymra Jørund Kvaale Hansen, leiar i Bygland Bondelag.
Landøyda er ein gul plante som er giftig for både menneske og dyr.
Den spreier seg lett viss ho får setje frø, og er mest eit problem for landbruket.
– Dei har slite veldig mykje med ho langs kysten og vi har vore skåna for ho her oppe. Men i år så har den blitt observert i Evje og vi har også fått tips om at planta kan vere i sørenden av kommunen her, seier Hansen.
Bondelagsleiar Jørund Kvaale Hansen er bekymra over at landøyda er observert i Setesdal.
Foto: Leif Dalen / NRKDødeleg
Spesielt er beitedyr som hest og storfe utsett om dei et landøyda, og sjølv små mengder kan gje dødeleg utfall.
Planta er og giftig etter tørking.
Planten har dei siste åra spreidd seg raskt langs kysten, blant anna i Agder.
Arendal er ein av fleire kommunar som trappar opp kampen mot landøyda.
– Ein kverk for kulturlandskapet
Bondelagsleiaren i Bygland er veldig bekymra for spreiinga.
– Vi er få bønder her, og den einaste måten å bli kvitt planta på, er å luke. Når vi då er få bønder igjen her oppe, som driv mykje areal og mange garder, så har vi ikkje sjanse til å klare lukejobben aleine om planten skulle spreie seg oppover dalen, seier Hansen.
Han fryktar ingen bønder vil ta på seg ansvaret for å drive et areal med masse landøyde på.
– Det kan vere ein kverk for kulturlandskapet. Det er ein grunn til at ho heiter landøyde – ho legg land øyde. Det er ein stor utfordring for kulturlandskapet i Setesdal om landøyde får spreidd seg oppover, seier Jørund Kvaale Hansen.
Landøyda bør ifølgje myndigheitene rykkast opp med rota, puttast i plastpose og kastast i restavfall for brenning.
Foto: Miriam GrovSer du planten, blir du oppmoda om å ta ho opp med rota, putte ho i ein plastpose og levere til restavfall for brenning. Bruk hanskar, sidan nokon reagerer på hudkontakt med planten.
