Garra gilvu oažžut geassebarggu

– Geassebargguid alde lea garra gilvu, muhto oahppásiid bokte lea álkkit oažžut barggu, lohká nuorra geassebargi.

Kárášjohkalačča guovttos Kátjá Márjá Grønnli ja Lemet Johanas Nystad gal leaba lihkkohan geassebarggu.

Seastit ruđaid

Kátjá Márjá Grønnli (17) illuda go lea ožžon geassebargu. Ii ge leat jurddašan ruđaid golahit vuos masa ge.

– Dieđusge áiggon seastit, go boarráseabbo šaddá de sáhttá biilla oastit dahje juoidá eará maid dárbbaša, dadjá Kátjá.

Lemet Johanas Nystad (16) vázzá Lillehammeris Norges toppidrettsgymnasas dahjege njunušvaláštalliid joatkkaskuvlla. Son maid ozai geassebarggu tietnasa dihtii, son dárbbaša ruđaid go vázzá veahá divrasat skuvlla:

– Mun oainnat váccán divrras skuvllas, ferten dasa bidjat veahá ruđa, lohká Lemet Johanas.

• Loga maid dárogillii: Vanskeligere for ungdom å få sommerjobb (ekstern lenke)

Geassebargu gielddas

Soai leaba ožžon čorgenbarggu gielddas. Galgaba čorget beahcemuoraid mat leat báhcán maŋŋá go sahájedje muoraid Kárášjoga márkanis ja márkana lahka.

– Dat lea veahá lossa bargu, muhto dat ferte muhtin dán maid bargat. Ferte veahá čábbát márkana čorget, dadjá Lemet Johanas.

Jus leažžá arvi, dat ii hehtte sudno bargamis:

– Eat mii leat sohkkaris ráhkaduvvon, dat gal manná bures, čaibmá Kátjá.

Skihpárat geain ii leat bargu

Lemet Johanas muitala ahte sus leat olu skihpárat geain ii leat geassebargu. Son dadjá ahte ii ábut soffás čohkkát ja vuordit ahte earát ohcet barggu du ovddas, fertet ieš ohcat. Son jáhkká maid okta sivva bargguhisvuhtii lea ahte Kárášjohka ii leat nu stuoris.

Olu geassebarggut eai goassege almmuhuvvo, muhto olbmot ožžot geassebarggu fuolkevuođa ja ustitvuođa bokte dahje ahte olbmot ieža váldet oktavuođa fitnodagaiguin. Nystad oaivvilda ahte dus lea ovdamunni jus dovddat olbmuid:

– Ferte dovdat olbmuid, dalle sii dihtet makkár olmmoš don leat, leatgo barggán vai it, muitala Nystad.

Ii leat vel ožžon geassebarggu

Erik Nilsen (18) lea ohcan geassebarggu, muhto ii leat vel ožžon barggu.

Son muitala ahte sus livččii miella bargat vai ii dárbbaš ruovttus čohkkát biepmadit gieđaid. Nie gal áigi šaddá guhkki. Erik liiko leat olgun, ja danne lea miella dakkár geassebarggu mas beassá olgun leat.

Measta buot Erik skihpáriin lea geassebargu, dainna lea ge erenoamáš váivi go sus ii leat geassebargu:

Maid áiggut bargat dán geasi jus it oaččo barggu?

– Dalle lea dilli luosaid bivdit, čaibmá Nilsen.

11 600 geassebarggu

– Dán jagi lea dán rádjai almmuhuvvon nav.no bokte 11 600 geassebargosaji, dadjá NAV seniorráđđeaddi Johannes Sørbø.

Dát lohku lea seamma go diibmá, muhto eai nu olu go guovtti-golmma jagi áigi.

Sørbø muitala ahte sii vuhttet ahte nuoraide lea váddásat go ovdal oažžut geassebarggu. Sørbø lohká dása leat čilgehussan earret eará dat ahte olgoriikkas leat boahtán eanet bargit.

– Dát dagaha ahte lea stuorát gilvaleapmi bargguide maidda ii dárbbaš fágalaš gelbbolašvuođa, lohká son.