Jådediddje Sálto sámesiebren, Hugo Kalstad, sávvá árvvalusájt ålles sebrudagás prosjæktaj mij suv mielas la ájnas.
- La ájnas ahte ålles sebrudahka, ja ij dåssju ájnegis organisasjåvnnå, luohtet dajda persåvnåjda gudi galggi barggat prosjevtajn. Mijá siebren la birrusin 50 sebrulattja, valla sáme sebrudak la ållo stuoráp. Mijá mielas la huj ájnas barggo ja mij sihtap buoremus ulmutja galggi åvdåstit sámijt javlla Kalstad.
Tjåhkani avta oajvvadusá birra
Kalstad doajvvo ahte tjåhkanime maŋŋel gånnå lij oadtjum árvvalusájt namájda, tjåhkani da institusjåvnå, organisasjåvnå ja siebre gudi li gåhtjuduvvam boahtet árvvalusájn tjåhkanibmáj gånnå gæhttjali guorrasit avta oajvvadusá birra.
Ájnas barggo
«Dat la ájnas barggo mij guosská ålles sáme sebrudagáv dán guovlon. Dan diehti sihtá Sálto sámesiebrre-NSR duollat rabás tjåhkanimev dágástalátjit makkir tjoavdos la buoremus sámijda, ja makkir ulmutja buoremusát máhtti bærrájgåhtset mijá berustimijt ja dárbojt «prosjevtan». La mijá mielas sávadahttet ahte guorrasip avta árvvalusá birra majna la loabálasjvuohta sáme sebrudagán ja mij máhtta bærrájgåhtset mijá berustimijt ja mijá dárbojt», tjállá sámesiebrre girjen.
Sámedikkeráde nammadi ájrrasijt
Sámedikkeráde la válldám åvdåsvásstádusáv nammadit gålmmå ájrrasa gudi galggi vijddásappot barggat TDMS-prosjevtajn.
– Mij lip gatjádam ájggeguovddelis siebrijt, ja gatjádam jus siján li oajvvadusá gudi hiehpi dakkár barggonammadussaj. Lip vuorddemin vásstádusáv sijájs, javlaj Henrik Olsen, varresvuoda åvdåsvásstediddje sámedikkeráden, NRK:j árabu dan vahko.
Ulmme bargojn la sámedikkeráde milta ahte «STH-juogos galggá, aktan ájrrasij bájkálasj sámesebrudagájs, tjadádit TDMS álggoprosjevtav, ájggomus le buktet avtajienalasj oajvvadusáv suohkanijda»
Tjåhkanibme ásaduvvá Árranin, Ájluovtan lávvodagá snjuktjamáno 15. biejve.
