Norgga, Suoma ja Ruoŧa Sámedikkiid ovddasteaddjit leat dál čoahkkanan Murmánskii, gos ságastit Ruošša beale sámi ovddasteddjiiguin movt buoremusat sáhttá ovttasbargat riikkarájiid badjel.
Olu jagiid lea ságastallojuvvon ahte ásahit sierra sámedikki maiddái Ruššii.
Váttisvuođat Ruošša eiseválddiiguin, ja ahte dál gávdnojit nu olu iešguđetlágan sámi organisašuvnnat Ruoššas, dagaha váttisvuođaid.
– Ii ábut vuordit buoret dili
Norgga Sámedikki presideanta, Aili Keskitalo, ii loga sámiid sáhttit vuordit buorideames ovttasbarggu Ruošša beale sámiin dassái go Ruššii ásahuvvo sámiide parlameanta.
– Ruoššas lea eará lágan demokratiija go davviriikkain, mii diehtit ahte dáppe ii leat seamma sátnefriddjavuohta, ii leat dat seamma organisašuvdnafriddjavuohta ja dat dieđusge váikkuha sámi álbmogii Ruoššas, dilli lea nu movt dat lea, ja mon jáhkán ahte mii eat sáhte vuordit dassážii go dilli buorrána, mii fertet bargat daid eavttuid mielde mat dál leat, lohká Keskitalo.
Murmánskka čoahkkimis leat davviriikkaid ovddasteaddjit beassan gullat sierranas organisašuvnnaid birra, maid bokte Ruošša beale sámit ieža oaivvildit ahte sii dálá dilis sáhtašedje buoret bargat ovttas sámiin Ruoŧas, Suomas ja Norggas.
Sámedikkit deaivvadeamen ruošša beale sámiin Murmánskkas.
Foto: Berit Solveig Gaup / NRK– Davviriikkain ge erohusat
Vaikko davviriikkaid sámedikkit barget ovttas nugo Sámi parlamentáralaš ráđi bokte, de vuhttet sii ge ahte davviriikkain ge leat erohusat, lohká Ruoŧa sámedikki lahtu Ingrid Inga.
– Jos mii geahččat dán golbma sámedikki Norggas, Ruoŧas ja Suomas de ii han mis ge leat seamma struktuvra, mis han ii leat seamma vuođđu ge, diehttelasat gávdnojit áššit mat leat seammalágan, muhto dán ge lea mu mielas dehálaš atnit muittus ja nu dohkkehit dan struktuvrra mii gávdno dál Ruoššas, lohká Inga.
– Ruošša sámiid duohken
Sámedikkiid ovddasteaddjit deattuhit maid ahte lea dehálaš ahte Ruošša beale sámit ieža leat láidesteaddjn sierra sámi parlameantta ásaheames Ruššii.
– Dat ferte boahtit Ruošša beale sámiin dat hállu ahte ásahit sámedikki dahje sullasaš orgána, dat lea buot deháleammus go mii hállat sámedikki dahje sullasaš orgána ásaheame Ruošša beallai, lohká Suoma Sámedikki presideanta Tiina Sanila-Aikio.
Otne lei ge Sámi parlamentáralaš ráđđi bovden ságastallančoahkkimii Murmánskii, Ruoššas.
NRK Sápmi bovdii Norgga sámediggepresideantta, Aili Keskitalo, Suoma sámediggepresideantta, Tiina Sanila-Aikio, ja Ruoŧa sámedikkeláhtu Ingrid Inga digaštallamii.
- Gula ságastallama Sáhkaváibmosis:
Ruššii maid sámediggi
