Beaivváš bártni teáhterbihttá sámi multidáiddára Nils-Aslak Valkeapää, Áillohačča (1943-2001) birra lea dáiddárgovvádus, mii roahkkadis vuogi mielde govvida Áillohačča dáiddársielu eallingeainnu válljejumiid ja rahčamušaid.
Minimalisttalaččat hábmejuvvon teáhterlávdi, stálleivnnat seainnit ja neavttárat vilges gáktelágán biktasiiguin addet geahččái buori vejolašvuođa fuomášahttit lášmadis ja buori neavttašeami.
Ii daga sáŋgárin
Dát teáhterbihttá ii daga Áillohačča mange ládje sáŋgárin. Dat lea eanet muitalus das, man garrasit sáhttá šaddat dáistalit go vállje earálágán eallinvuogi go dan maid du lagaš servodat vuordá dus.
Oalle álás vuogi mielde čájehuvvo mot Áillohačča lagaš olbmot vuos eai sihtan dohkkehit ahte son álggii bargat dáiddárin. Ja dan maŋŋil ahte Aillu eallinvuohki maid čuozai su bearraša gudnái.
Jarkko Lahti, guhte neavttaša Áillohačča, ovdanbuktá hui vuohkkasit Áillu litna vuogi kommuniseret earáiguin ja lagašvuođa ja ráhkisvuođa lundui.
Eará golbma neavttára Tiina Wickström, Mary Sarry ja Ingor Ante Ailu Gaup leat ovttas váldorolla neavttáriin Jarkko Laitin mielde dahkamin dán bihtá dovdduide čuohcci muitalussan.
Čuohcá dovdduide
Dás čájehuvvo jáhkehahtti vuogi mielde man sakka Áillohaš ráhkistii luonddu, sámi álbmoga ja man garrasit sus bulii dáiddaovdanbuktin dolla ja makkár váivviid ja rahčamušaid sisa dát su eallingeaidnu doalvvui su.
