Inga Juuso Márkomennui

Eanet artisttat leat dál reidasat Márkomeanu 10-jagi ávvudeapmái. Sin gaskkas lea beakkán juoigi Inga Juuso joavkkuinis.

Inga Juuso
Foto: Tone Jorunn Tveito

Preassadieđáhus:

Inga Juuso

Go Inga Juuso buktá iežas joavkku Márkomennui mearkkaša ahte árbevirolaš juoigan, improviserenmusihkka ja modearna elektronika seaguhuvvojit earenoamáš konsearttas. Juuso lea
maŋimus jagiid leahkán mielde máŋga CDa almmuheame, earret eará áivan ovttasbargu Steinar Raknesain Skáidi-joavkkus, ja 2008 bođii su skearru Váimmu ivnnit/Patterns of the Heart.


Reiddas 10-jagi ávvudeapmái lea nai Kárášjohka-artista Elin Kåven, guhte galgá čuojahit lávlagiid su boahttevaš skearrus Jikŋon musihkka/Frozen Music. Lassin boahtá hurri Max Mackhé dan jagi festiválii lávlagiiguin su skearrus The Dog Inside. Goabbat artisttaid skearrut almmuhuvvojit 2009
geasi mielde.


Dat mearkkaša ahte čuovvovaš artisttat leat reidasat Márkomeanu 10-jagi ávvudeapmái: Adjágas, SomBy, Johan Sara jr., Wimme Saari, Marthe Valle, Inga Juuso, Elin Kåven ja Max Mackhé.

Oanehaččat

  • Dál juo sáhtat jienastit

    Suoidnemánu 1. beaivve rájes lea vejolašvuohta jienastit, boahttevaš čavčča gieldda- ja fylkkagieldda válggaide. Dus geas lea dát dárbu, sáhtát váldit oktavuođa gielddain, ja soahpat jienastanáiggi. Ná sáhtát dahkat vaikko guđe gielddas háliidat Norggas, nu guhká go dus lea legitimašuvdna mielde. Dát ordnet lea eará go dat dábálaš «ovddalgihtiijienasteapmi», mii ges rahpo borgemánu 10. beaivve. Dát boahtá ovdan Gieldda- ja ođasmahttindepartemeanta almmuheamis.

     Ovdalgihtiijienasteapmi
    Foto: Gieldda- ja ođasmahttindepartemeanta
  • Áhčči ja bárdnis gávdnon

    Áhčči-olmmoš ja bárdnis geat ievttá eahket dieđihuvvuiga láhppon gaskal ruoŧarájá ja Femunden-jávrri, Hedmárkkus, leaba dál gávdnon. Soai leigga vánddardan meahcis máŋgga beaivvi. Soai bijaiga johtui ruoŧabeale rájá, muhto eaba joavdan šihttojuvvon báikái, Norgga bealde, lohpiduvvon áigái. Ruoŧa politiijat ledje dáhtton norggabeale politiijaid veahkkin ohcat. Lei ovtta gaskka garra hastalus gávdnan dán guoktá, go helikopter mii galggai viežžat dán guoktá vulos váris, ii gávdnan sunno. Áhčči-olmmoš buohccái meahcis, ja ii stánden dasto veahki haga beassat vulos.Sihke Norgga- ja Ruoŧabeale gádjunolbmot ohce dán guoktá.

På forsiden av NRK Sápmi nå