Doaibma lassána

Oljoealáhusas doaibma davvin lassána, muhto gelbbolašvuohta lea váilevaš.

Melkøya - Snøhvitfeltet

Moalkkuin lahka Hámmarfeasta lea stuorra dárbu inšeneavrraide.

Foto: Scanpix

Lea surgat go Davvi Norggas livčče bargu eambbo go doarvái oljoealáhusas, muhto lihkká leat ollu nuorat geat eai čađat joatkkaskuvllaoahppu mii attášii dan gelbbolašvuođa mii gáibiduvvo ealáhusas, lohká Norsk Industriija fágahoavda Jørn Sund Henriksen ievttá Barentsábikonferánssas Hámmarfeasttas.
Logut čájetit ahte 75 % gánddain geat váldet ámmátfága Finnmárkku joatkkaskuvllain, heitet gaskan.

Norsk Industriija fágahoavda Jørn Sund Henriksen mielas lea surgat go Finnmárkku nuorat eai gerge joatkkaskuvlla, ja lohká maid leat vahágin go nuorat garvet dan váddámus matematihka mii dagažii vejolažžan lohkat maiddái inšenevran. Riikkas lea stuorra váilevašvuohta dáidda, ja eandalit oljoealáhusas.

Danin illuda Henriksen go gullá Hammarfeastta joatkkaskuvllas gal lassánit oahppit geat válljejit realfágaid.

Ievttá Barentsábisemináras muitalii ge Hámmarfeastta joatkkaskuvlla rektor Marianne Sivertsen Næss ahte sin skuvllas lassánedje diimmážis realfága oahppit logis čiežagoalmmatlohkái. Sivvan dása lohká Næss leat earret eará buori ovttasbarggu skuvlla ja ealáhusa gaskka.

– Mis lea ovdamearkka dihtii oktavuohta Statoilain ja Muolkkuin. Ovttasbargosoahpamuš dáhkka ahte luohkkáin leat prošseakta mii addá sidjiide vejolašvuođa oktii vahkkui čiekŋudit min bargui, čilge Henriksen.

Henriksen lohká Norsk Industriija bealis dáhkidit barggu inšenevrra studeanttaide.

Oanehaččat

  • Guoddala mearrádusa

    Luonddugáhttenlihttu guoddala Birasdirektoráhta mearrádusa ahte addit ruvkefitnodahkii Nussirii lobi luoitit guokte miljovnna tonna ruvkebázahusaid Riehpovutnii. Sii gáibidit ahte Nussira ja Gumppenjuni ruvkedoaibmamearrádus ii biddjo fápmui, ja ahte luoitin lohpi váldu ruovtto-luotta. Jus luoitigohtet bázahusaid vutnii, de dat lea okta dain stuorámus nuoskkidanroasuin ođđasat áiggis Norggas, lohká luonddugáhttenlihtu jođiheaddji Lars Haltbrekken.

  • Man olu ealga gulaskuddamis

    Man olu ealga sáhttá leat Romssa fylkkas, dat ášši lea dál gulaskuddamis. Máŋga sajis leat nu ollu ealggat ahte olbmot eai duostta šat vuolgit vázzitge, ja eai goassege ovdal leat vuddjon nu olu ealggat go dál Mátta- ja gaska-Romssas. Romssa fylkkagieldda meahcástallan ráđđe-addi Torild Skoglund lohká gielddaid iežaset mearridit ealgalogu.

På forsiden av NRK Sápmi nå