Dan golbma alimus divišuvnnas Norggas leat ráidočiekčamat dien áigodagas go Viva World Cup manná, nu eai beasa dat buot buoremusat searvat.
Lei hálidit čiekčat
Jonas Johansen válddi 2006:s Viva World Cup vuoittu sámi almmáiolbmujoavkkun, muhto dán gease ii sáhtte son ge searvat čiekčamiidda.
– Dalle leat ráidočiekčamat nu ahte suinne ii leat gal vejolaš čiekčat vaikko livčči hálidit, čilge Jonas Johansen.
Jonas Johansenis lea elitečiekčanhárjehallan, son čievččai diibmá 1. divišuvnna joavkkus Haugesunddas, ja lea seamma dásis Kongsvingeris dán jagi.
– Mis lei buorre joavku 2006 čiekčamiin, muhto eatnašat geat dalle ledje mielde, eai beasa ráidočiekčamiid geažil mielde dán jagi, jáhkká Johansen.
Sámis elitečiekčit
Njealjjis geat čikčet eliteserienis Norggas, vuite Sámejoavkkun golli Viva World Cup:s. Bodø/Glimt Trond Olsen ja Olav Råstad, TIL čiekči Tom Høgli ja Strømsgodset Steffen Nystrøm. Muđui Kongsvingera Jonas Johansen ja 1. divišuvnnajoavkku Álttá, mas leat maŋga sápmelačča joavkkus. Dasa lassin leat maiddái Norgga nuppidivišuvnnas čiekčamat, nu go earret eará TUIL joavkkus gos leat sámi almmáiolbmujoavkku čiekčit.
– In leat dušše mun gii šallošan go eat beasa čiekčat, lean Trond Olsenin hállan ja son lea seamma oaivilis, lohká Jonas Johansen.
Kongsvinger čiekči Jonas Johansen lei ovdal hálidit Viva World Cupa dakkár áigái go Norggas eai leat čiekčamat, muhto nu ii oačču.
Suoidnemánus Jielleváris
Sámi spábbačiekčanlihttu várrepresideantta Håkan Kuorak šalloša go sáhttá šaddar nu ahte dat buot buoremus čiekčit eai sáhte čiekčat Viva World Cup:a.
– Leat geahččalan heivehit čiekčamiid, muhto eat diehttán ahte Norgga ráidočiekčamiin ii leat boddu, nu go eará guovlluin EM-čiekčamiid oktavuođas, lohká Kuorak.
Kurdistan buorre joavku
Spábbačiekčanlihttu N.F.-Board dat lágida Viva World Cupa masa Sápmi, Padania, Kurdistan, Syria ja Provence leat almmáiolmujoavkkuid dieđihan ja nissonjoavkkut leat Sápmi ja Kurdistan, čiekčamiin mat álget suoidnemánu čihččet beaivve.
– Kurdistan lea buorre joavku go leat bures birgen čiekčamiin Asias, lohká Håkan Kuorak, gii jáhkká allas dási dán gease čiekčamiin.
Jonas Johansen lohká ollu buriid joavkkuid dán gease, ii ge nu go 2006 doaluin Oksitanias.
– Danin lea šallošahti, go dat buoremusat eai čievčča dán gease, lohká Johansen.
Jáhkká lihkká buorre joavkku
Sámi spábbačiekčanlihttu várrepresideantta Håkan Kuorak ii jáhke gal nu ahte Sámi almmáiolbmuid- ja nissonjoavkkus ii šatta buorre joavku dán gease, vaikko dat buot buoremus čiekčit fertejit ráidočiekčamiid vuoruhit.
– Mii gal galgat nu bures go vejolaš gávdnat daid buoremus čiekčiid geat sáhttet searvat, loahpaha Kuorak.