– Fertejit min duođas váldit

Suorggahahtti, nu gohčuda boazoeaiggát boazodoallohálddahusa áššemeannudeami boazologu ektui.

Advokat Geir Haugen og reineier John Anders Sara

Ádvokahtta Geir Haugen ja John Anders Sara.

Foto: Marja Saijets / NRK

Diggeáššis mas boazodoalli lea váidan boazodoallohalddahusa go ii leat ožžon buvttadandoarjaga, šattai ikte sáhka das ahte leago boazodoallohalddahusas geatnegasvuohta addit álmmolaš boazolohkanbohtosii boazodoalliide vuoi ii.

Son gal lea eddon

– Dat mii dás lea suorggahahti lea boazodoallohálddahusa jođiheaddjiid oaidnu álmmulaš boazolohkama ektui, go sii lohket ahte eai dárbbaš addit daid álmmolaš lohkanbohtosiid. Nu lohká boazodoalli John Anders Sara Kárášjogas, gii lea mannan diggái go ii fitnen boazodoalobuvttadandoarjaga guovtti jahkái.

Sara oaivvilda leat boasttut go daid álmmolaš lohkanbohtosiid ii leat vejolaš fitnet.

Njukčamánu 15. beaivve lea áigemearri goassažii galgá leat njuovvan, muhto boazodoalli ii ožžon 2005 boazolohkamis bohtosa ovdal njukčamánu loahpas, nu son lei guovtti jahkái massán buvttadandoarjaga.

Boazodoalli ovddasvástádus

Diggeáššis maid John Anders Sara lea vuolggahan buvttadandoarjaga dihte, šattai eanaš sáhka das ahte mo boazolohku mearriduvvo. Eambbo go 600 bohcco eai galggašii boazodoallis, jos buvttadandoarjaga galgá olahit.

Boazodoalohálddahusa beales lei sadjásaš boazodoallohoavda Stig Gøran Hagen Hålogalandda lágamánnerievttis Kárášjogas, ja son lohká boazodoalli ovddasvástádus diehtit iežas boazologu. Son maid logai dikkis ahte lea boazodoalli iežas duohken dieđihit eiseváldiide man ollu bohccot sus leat. Muhto go álmmolaš lohkan čađahuvvo, de lea dat lohku mii biddjo vuođđun rehkenastit doarjagiid - iige boazodoalli iežas lohku.

Addit loguid boazodoalliide

Diggeášši lea Sara vuolggahan go lea massán 260 duhát kruvnnu doarjaga - go sus ii lean vejolašvuohta diehtit álmmolaš lohkanbohtosa. – Ovttamánu go leat čađahan álmmolaš lohkamiid, de berrejit daid sáddet boazodoalliide, vuoi sáhttet unnedit boazologu jos dárbu, lohká Sara.

Boazodoallohalddahusa bealis eai hálit kommenteret maidege diggeáššis, mii loahpahuvvo otne, muhto John Anders Sara gal lohká dán prinsihppaáššin.

– Munnuide lea dárbu čájehit ahte eai sáhte badjilgeahččat olbmuid ealáhusas dákkár áššiin, danin lea mannan diggái dáinna áššin, loahpaha Sara.

Oanehaččat

  • Busse čiđistii eret geainnus

    Politiijat leat dál váldán vuodjenkoartta bussevuoddjis go lea vuoddján váruhemiid, ja ii leat vel sihkar ahte oažžu go vuoddji dan ruovttoluotta otne. Eske iđđes čiđistii busse eret geainnus Romssas, dieđiha Romssa politiijaguovlu. Busses galget leamaš moadde olbmo mielde, ii oktage galgga leat roasmmehuvvan dáhpáhusas, čállá Nordlys áviisa. Politiijat leat dál dutkamin ášši.

  • Gassasuođđan Leaibevuonas

    Politiijat leat dál gidden Leaibevuona guollefitnodaga Gáddeiččain, ja leat ain dutkamin ievttá gassasuođđama. 45 ássi šadde guođđit Gáddáiččáid Muosáid gielddas, muhto dál leat beassan fas máhccat ruovttuide. Gássasuođđan lea dál bissehuvvon. Oarje-Finnmárkku politiijaguovllu operašuvdnajođiheaddji Sverre-Andre Opdahl, jáhkká ahte bieđganan ventiilla dat ii leat šat jeahkkán gássa.

På forsiden av NRK Sápmi nå