– Det er vanskeleg å samanlikne årgangar, men no er det nokre år sidan vi har greidd å bli seriemeister, så då smakar det litt ekstra godt, seier Roar Strand til NRK Trøndelag.
Les også:
39 år gamle Roar Strand starta karrieren sin juniorspelar i Nardo og debuterte for Rosenborg i 1989. Dei første sesongane sleit han med lite speletid i Rosenborg, men han fekk nok speletid til å bli seriemeister med klubben alt i 1990 og 1992.
Blei god i Molde
I 1993 blei Roar Strand lånt ut til Molde. Her jobba han knallhardt og la grunnlaget for den vidare suksessen som fotballspelar.
I 1994 var han tilbake i Rosenborg. Denne gongen fekk han fast plass på laget og på slutten av 1990-talet og 2000-talet blei han seriemeister heile tolv gongar med RBK.
Søndag kunne han toppe karrieren med sitt femtande seriemeisterskap for Rosenborg. Han syns stemningen i laget er betre no enn tidlegare.
– Det er mange her som ikkje har vore med å vinne seriemeisterskap tidlegare, så stemninga er ganske høg, seier Strand.
Lojal mot klubben
Roar Strand har aldri vore proff i utlandet. Han har fått fleire tilbod om å spele for utanlandske klubbar, men har takka nei og vore lojal mot Rosenborg.
Fleire gonger har han vore nær ved å legge fotballskoa på hylla, men søndag kveld kunne han garantere fansen at han blir med i spelarstallen til Rosenborg også neste sesong.
I alt kan Roar Strand smykke seg med tjue titlar. 15 seriemeisterskap og fem cuptriumfar.
– Dette er artig. Det var ikkje noko mål å greie akkurat tjue titlar, det viktigaste var å få i land seriemeisterskapet. Vi leiar med 17 poeng og det er ei god stadfesting på at vi har gjort det bra i år, seier Strand.