Tre norske utøvarar til finale i ro-EM

– Dette er første gong med to finaleplassar for Noreg i EM-samanheng, fortel Åke Fiskerstrand, trenar for Tale Fiskerstrand Gjørtz og tidlegare topproar.

I alt fem norske utøvarar er med til Italia og EM i Varese.

Tale Fiskerstrand Gjørtz (Aalesunds Roklub) er med i singelsculler på damesida, medan Nils Jakob Hoff (Fana Roklubb) og Kjetil Borch (Horten Roklubb) er med i dobbelsculler.

Det same er duoen Svein Urban Ringstad og Thomas Elholm (begge Bergens Roklubb).

Ringstad/Elholm blei slått ut fredag, medan både Fiskerstrand Gjørtz og Hoff/Borch tok seg vidare frå både forsøksheat og semifinalar.

Saka held fram under bildet.

– Finaleplassen var aldri truga

I singelsculler på damesida blei Tale Fiskerstrand Gjørtz klar for finale om lag klokka eitt laurdag.

– EM så langt viser at arbeidet etter U23-VM har vore rett. Finaleplass i hennar første seniormeisterskap er svært bra, seier trenar og far Åke.

I går fredag rodde ho seg til semifinale, etter ein andreplass i sitt forsøksheat.

I semifinalen blei ho klar for finale som nummer to. Ho blei slått av estlandske Kaisa Pajusalu. Nummer tre i semifinalen blei bulgarske Luiza-Mariya Rusinova.

Ifølgje World Rowing var ingen av dei tre truga av dei tre andre i semifinalen.

Finalen skal roast søndag klokka 13.17. I tillegg til Noreg, Esland og Bulgaria, er Litauen, Serbia og Russland representerte i singelscullerfinalen.

– Finaleplassen var aldri truga. No er det ikkje umogleg med medalje, men Litauen er soleklar favoritt, med Estland som sølvfavoritt. Men det er ganske ope etter Litauen, fortel Åke Fiskerstrand til NRK.no.

• LES OGSÅ: Medaljen glapp for Tale
• LES OGSÅ: -Tale har en reell sjanse til å komme til OL i sommer

Saka held fram under bildet.

Tett semifinale for herreduoen

I dobbelsculler for menn var Noreg representert med Nils Jakob Hoff og Kjetil Borch laurdag.

– Dei stadfesta nivået frå OL, og viser at årets innsats ikkje er tilfeldig, seier Åke Fiskerstrand.

Dei var i semifinale med den sterke kroatiske brødreduoen Sinkovic/Sinkovic som tok sølv i London-OL. I tillegg var polske Wasielwski/Chabel i heatet, ein duo som tok gull i Beijing-OL i 2008.

Norske Hoff/Borch kom på 7. plass i årets OL.

• LES OGSÅ: Roerne var 0,4 sekunder fra finalen
• LES OGSÅ: Norske medaljehåp får favorittstempel etter maktdemonstrasjon

I semifinalen var det Polen og Kroatia som førte an gjennom heile løpet, men mot slutten smatt Noreg forbi og tok andreplassen i feltet. Polen og Ukraina følgde like bak, medan Kroatia kryssa mållinja først.

Den norske duoen ror finalen sin klokka 11.47 søndag. I tillegg til Polen og Kroatia, er Italia, Litauen og Serbia i dobbelscullerfinalen.

– Kan bli to medaljar med full klaff

To finaleplassar i EM er altså historisk i norsk samanheng. Det klarer Noreg sjølv utan Olaf Tufte med til EM.

– Han er i tenkeboksen, fortel Åke Fiskerstrand kort.

To finaleplassar kan gi to medaljar, og innsatsen er allereie eit steg framover for norsk roing, ifølgje Fiskerstrand.

– Det kan bli to medaljar. I damefinalen meiner eg det er ope frå 2. til 6. plass, medan Hoff/Borch truleg vil hamne på alt frå 3. til 5. plass.

– Men med full klaff kan alt skje. Dei beste kan ha ein dårleg dag òg. Men vi er fornøgde med éin medalje, avsluttar Fiskerstrand.