Bjørnejakta i Møre og Romsdal har ikkje gitt resultat. I Isfjorden i Rauma tok bjørn livet av eit titals sauer, medan ein vaksen sau i Grøvudalen i Sunndalsfjella vart drepen på same måte. Dermed gav Fylkesmannen fellingsløyve på begge stadane.
Ikkje håp
I Rauma har jegerar vore ute på post nattetid, men no har dei gitt opp.
– Ikkje har vi gjort observasjonar av bjørn og ikkje har vi sett fleire sauekadaver. Så utsiktene til å ta bjørnen er lik null, seier leiar av fellingslaget i Rauma, Harry Magne Brude.
Fristen er ute
Fellingsløyvet går ut i morgon, måndag 16. juli. Kvar natt har to-tre mann frå jaktlaget vore ute for å høyre etter uroleg sau. Men det har vore heilt stille dei siste 14 dagane.
– Kvar bjørnen er eit ope spørsmål, seier Brude.
Ingen bjørn i Sunndal
Fellingslaget i Sunndal har heller ikkje gjort observasjonar som tyder på at bjørnen er i nærleiken.
– Eg trur ikkje bjørnen er i området no, sidan det ikkje finst nye sauekadaver, seier leiar i fellingslaget, Erik Mæhle.
Deira løyve går ut på tysdag, men Mæhle har ikkje noko håp om å ta bjørnen innan den tid. Han satsar heller på at Fylkesmannen gir nytt løyve, dersom fleire sauer vert drepne i sommar.
LES OGSÅ: