– Det er mange minne knytt til denne bana her, ja, smiler Kjetil Hasund i det han entrar Høddvoll.
Har du høyrt om Hødd, så har du mest sannsynleg høyrt om Hasund. Han herja med storlaga på 1960- og byrjinga av 70-talet. Han er ein av dei som skal ha æra for at Hødd faktisk var eit storlag for 40 år sidan.
– Ein må ikkje gløyme at eg spelte på eit veldig godt lag. Med mange gode spelarar.
– Vi kjente kvarandre ut og inn, og dei visste kvar eg stod på bana, seier den lune mannen – som tidlegare i år fylte 70 år.
Hugsar tilbake til 1981
Han er på kvar heimekamp, og følgjer klubben tett – som så mange andre tidlegare Hødd-spelarar. For det er noko spesielt med den vesle klubben.
– Vi er ein folkeleg klubb.
– Hødd har alltid vore i hjartet mitt, og eg trivst utruleg godt i Hødd. Då eg spelte hadde eg mange tilbod, men eg valde klubben og Ulsteinvik, seier Hasund.
Han legg ikkje skjul på at dama som seinare blei hans kone, også var ein viktig grunn til at han blei i Hødd. Han har mange minne frå fotballbana, men noko av det han hugsar best er storkampen mot Vålerenga i 1981.
– Det var vel 11-12.000 tilskodarar her. Det hadde nok ikkje blitt tillate i dag, humrar Hødd-legenda.
(Saka held fram under bildet)
– Sjansane er der
Men det var den gongen, torsdag er det cupkamp i 2012. Hødd tek i mot Asker i 4. runde, der blåtrøyene er favoritt. Dersom Hødd vinn, blir det første gong laget er i kvartfinale i NM sidan 1995.
Men Hasund vil ikkje la det stoppe med kvartfinale.
– Sjansane for cupfinale er der, absolutt. Men då må ein ha både flaks og flyt. Trekninga betyr ein del, og heime- eller bortekamp betyr ein del.
– Med litt flaks kan det gå heile vegen, seier Hasund.
Han står på banen der Hødd og Asker møtest i morgon, og 70-åringen kan ikkje anna enn å mimre.
– Det hadde ikkje vore så dumt å vere ung igjen. Det kriblar litt i føtene!, avsluttar Mr. Hødd.