Rustar seg til jervejakt etter sauedrap i Sunndal og Tingvoll

Seksjonssjef Ulf Lucassen hos fylkesmannen i Møre og Romsdal stadfester no at det er jerv som har drepe sau i Tingvoll og Sunndal.

– Det er heilt klart at det har vore jerv i området. Eit av dei 10 kadavera som er funne har i alle fall blitt drepe av jerv. Det er litt usikkert kva som har skjedd med dei andre dyra. Men det er heilt klart at det har vore jerv i området, seier Ulf Lucassen.

• Jerv tek sau - 100 sauer sakna
• Jerven hamstrer for vinteren

Klart for jervejakt

Sauebøndene håper i det lengste på at sauene kan vere i live. Men 10 kadaver er funne, og no blir det jakt på jerv i området ved Ålvundfjord og Meisingset.

– Vi kan gje fellingsløyve på jerv som gjer skade frå 1. juni og ut beitesesongen. Det er aktuelt å opne for jakt om det kjem ein søknad om dette. Men den 10. september byrjar lisensjakta, og det kan gje vel så godt utbyte å vente nokre dagar på dette, seier Lucassen.

• Jerveskyttaren må ut med 20.000 kr
• Får felle jerv i Jostedalen

– Tenkte på tjuveri

Saueeigar Rune Båtnes Hanem har vore inne på tanken om at sauene kan ha blitt stolne. For det er eit svært stort tap for saueeigaren.

– Tanken om tjuveri har streifa oss. Men korleis i all verda skal dei ha fått til det? Det er jo ikkje nokon stad her der det er mogleg å parkere ein lastebil for å få med seg sauene utan at nokon legg merke til det. Det er fysisk umogleg i desse traktene her.

• Jerven drep færre sauer
• Rekorduttak av gaupe og jerv

Omfattande leiteaksjon

Opptil 8 mann og tre hundar har leita etter sauene dei siste dagane. Dei har ikkje sett snurten av ein einaste levande sau. Men no er det funne sauekadaver i området. Kadavera ber preg av at det er jerv som har forsynt seg.

– 100 sauer utgjer ein stor flokk når du har dei samla. Vi har funne tilsaman 10 kadaver. Det har ikkje vore jerv i dette området tidlegare, seier saueeigar Rune Båtnes Hanem til NRK.

Leitar vidare med helikopter

Det er no aktuelt å leite etter saueflokken med helikopter. Akkurat no er leitemannskapa slitne, og det er uaktuelt å leite i området til fots no.

– No er opplegget at vi må kvile oss litt. Kanskje vi finn nye idéar til korleis vi skal finne sauene. Men vi tykkjer det ser svart ut no, ja vi gjer det, seier saueeigar Rune Båtnes Hanem.