Veret er langt betre enn det har vore dei siste dagane. Det har gått skred nokre stader i går kveld, men vegvesenet opplyser at situasjonen no er langt rolegare enn det har vore dei siste dagane.
Det er ope over Ørskogfjellet, Sunndalen er open. Det same gjeld Vågstranda-Måndalen og Romsdalen.
- Det gjekk ikkje noko skred på Ørskogfjellet i natt og veret er betre. Det hadde ikkje nokon hensikt å halde strekningane stengde lenger, seier Ivar Hol i Statens vegvesen.
•
•
•
Sunndal var isolert i natt
Frå Sunndal går vegane til og frå i tre hovudretningar. Mot nord, gjennom Oppdølsstranda har vegen vore stengd sidan måndag. Sunndalen, som går austover mot Oppdal, har vore stengd i periodar. Men i natt stengde også den vestlege ruta i retning Molde. Dermed var Sunndal fullstendig isolert frå omverda.
- Her ser forholda bra ut, og med unnatak av Oppdølsstranda blir desse vegane opna, seier Ivar Hol. I Oppdølsstranda må vi rydde dei store skreda som gjekk i går. Vi må også vurdere om skredfaren er over i Horrvika. Det var eit skikkeleg stort skred som gjekk der.
•
•
•
Stranda-Hellesylt opna
For folk på Sunnmøre er vegstrekninga Stranda-Hellesylt svært viktig. Strekninga er også viktig for møbeleksporten frå Sykkylven og for produksjonen av pizza og kjøtvarer i Stranda.
- Dette er den vegen vi må konsentrere oss om no. Dette er den viktigaste vegen på Sunnmøre å få opna. Det er ein livsnerve for dei som bur i området. Ut over formiddagen må vi ha eit svar på kva som skal skje her, seier Hol.
Og fredag formiddag gav arbeidet resultat. Fv60 blei opna mellom Røyr og Hellesylt.
•
•
•
- Vonar ekstremsituasjonen er over
Ivar Hol i Statens vegvesen ser lyst på situasjonen fram mot helga. Alt ser mykje rolegare ut no.
- Vi vonar ekstremsituasjonen er over. No går vi alle meir over i normalmodus, seier Ivar Hol.