Vegen stengd heile måndag

Det ligg framleis lausmasse i fjellsida. Dette må reinskast vekk før Riksveg 70 kan opnast etter raset.

Heile dagen

- Arbeidet med å reinske fjellsida kjem til å ta heile dagen, seier distriktsvegsjef Jan Arild Johansen. Også i morgon må vi ta ei vurdering for å sjå kor nær vi er ei opning, seier han. Vi har hatt geologar oppe ved startpunktet for raset. Der ser det for så vidt greit ut. Der er rasfaren no verken større eller mindre enn før raset gikk. Lenger nede i fjellsida ligg det imidlertid masse som må fjernast, seier Johansen.

Mannskap i rasområdet

Mannskap skal no inn i rasområdet for å rydde fjellsida. Raset har lagt frå seg lausmasse like ovanfor vegen. - Denne lausmassa må bort. Dette vil ta resten av dagen i dag, og deler av dagen i morgon, seier Johansen. Raset har gjort lite skade på sjølve vegen, legg Johnsen til.

Fanggjerdet

- Fanggjerdet over vegen har gjort nytte for seg, seier Johnsen. Dette gjerdet har redusert skadane betydeleg. Mykje av lausmassane ligg fast i gjerdet, og dette må ryddast vekk. Store deler av fanggjerdet må sjølvsagt også reparerast, seier distriktsvegsjef jan Arild Johansen til NRK.

Glad vegen er stengd

Ordførar i Sunndal, Tove-Lise Torve er glad for at Statens vegvesen vil halde vegen stengd. - Eg er veldig glad for at ein tek tryggleiken på høgste alvor og ikkje opnar vegen før det er trygt å ferdast der, seier ho.

Båttransport

I samband med at vegen er stengd blir det sett opp båtskyss forbi rasstaden. Båtruta startar truleg om lag klokka 16.00 måndag ettermiddag. Båten skal gå i rute mellom Oppdøl og Sunndalsøra. Dette er ein hurtiggåande passasjerbåt, som ikkje tek om bord bilar.

Skrekken verst

Sjølv om raset har ført til mange praktiske vanskar for lokalsamfunnet er det skrekken som er verst, seier Torve. - Det aller verste er at det store skredet har kome. Vi er redde, vi er oppskjørta og fortvila og det er kanskje den største utfordringa vår, seier Torve.