Det var ti år gamle Oliver Clausen-Bekken som fekk innvie det lenge etterlengta stupetårnet i Molde. Clausen-Bekken hoppa frå tre og ein halv meter, men innrømte at det var ei heller kald oppleving.
– Det er litt kaldt, hutra Clausen-Bekken.
Han sprang likevel villig fram då ordførar Torgeir Dahl spurde om han klarte eit hopp til.
Ordførar stod for bandklippinga
Det er ved Retiro i Molde det nye stupetårnet står. Ordførar Torgeir Dahl stod for bandklippinga, og skulle gjerne også stått for opningshoppet.
– Eg har ein infeksjon, så då kan eg dessverre korkje hoppe eller stupe, men om eg var frisk skulle eg gjort det. Det hadde kanskje vore litt meir morosamt det, seier ordføraren.
Etter å ha sett testhopparen hoppe, kunne han likevel seie seg nøgd.
– Det fungerer veldig bra, og no ser vi at det er trygt. Det er flott, seier han.