Stuorra berustibme duodjelåpptimij

– Gå nav ålos gå 20 oassálasstin gápptegoarromkurssaj juo álgon la duodaj viehka ållo. Mån iv lim álgos åvvånis jáhkkám nav ålos galggin álgget, ja lav nav ávon gå nav ålos oassálassti, javllá julevsáme duodjebagádalle Lilian Urheim.

• Lågå aj: Árran gievrot duodjeprográmmav

Dán gidá sån álgij julevsáme duodjebagádallen ja oanegis ájgen la sån gergas tjadádittjat dav stuorámus duodjelåpptimav Divtasvuonan 14 jagen.

Jagen 1994 tjadádij Bådåddjo allaskåvllå jahkásasj duodjeåhpadusáv ja soames jagij maŋŋel aj fáladuváj duodje-fáhkagirjje åhpadus majt soabmása válldin, valla dat rájes ælla ietján gå smávep duodjekursa læhkám julevsáme guovlon.

Valla ådå duodjebagádalle sihtá dáv dilev rievddat.

Duodjekursa juohkka máno dán tjavtja

Tjavtjan sån álgat måttijt duodjeseminárajt ja kursajt.

– Mij lip dahkam plánav gånnå l seminárra akti mánnuj ja dasi tjuovvu kurssa. Dán tjavtja tjadádip ålles vihtta dakkir seminára aktan kursajn guhtta duodjetiemáj birra mij la gápptegoarrom, gahpergoarrom, njálmmefáhttagav goarrot, oahppat låhtåt ja snjisskot ja sliehpáv goarrot, subtsas Urheim.

Ålos li juo diededam ietjasa divna dájda kursajda ja Urheim doajvvu dagu gápptegoarromkursan sjaddá sæmmi stuorra berustibme dájda tjuovvovasj kursajda.

Valla duodden Lilian Urheim iehtja aj fállá bagádallamijt.

– Mån la Árranin duolloj-dálloj ja ulmutja de máhtti mujsta oadtjot viehkev gå li duodjuhime. Ja dåhkki aj riŋŋgut ja mån aj máhtáv dagu Skypa baktu vuosedit gåktu galggi dagu duov-dáv dahkat. Mån luluv viehkedit gåktu sávvev goarrot, gåktu máhtsastit, vadjamviehkev vaddet ja ietján dagu gåsstå sasnijt ja tyddjajt oasstet, subtsas sån.

Ienebuv duodjeprográmma birra lågå danná.

Ja duodden dájda kursajda de aj Divtasvuona ASVO tjadát edna kursajt dán tjavtja, sihke garraduojen ja dibmaduojen.

Divtasvuona ASVO duodjekursaj birra lågå dánna.

Dudálasj oassálasste

Akta gut oassálastij gápptegoarromkurssaj la May-Judith Haukeland Amundsen Ájluovtas, Divtasvuonan.

Sån la viehka dudálasj.

– Lij riek suohtas ja huj buorre kurssa muv mielas. Danen gå lij nav tjiehpes åhpadiddje ja mijáv nav buoragit måvtåstuhtij, javllá May-Judith Haukeland Amundsen.

Sån gut åvddål ittjij máhte gáppteminsstarijt dahkat la dal oahppam dav.

– Oahppam la minsstarav dahkat, dav majt åvddål ittjiv máhttám, subtsas sån.

Vuorddeba stuoves fálaldahkan

Ja sihke sån ja julevsáme duodjebagádalle, Lilian Urheim doajvvoba dát duodjelåpptim julevsáme guovlon mij uddni l prosjækta mij ruhtaduvvá dáv jagev, joarkeduvvá stuoves fálaldahkan.

– Mij ep dálla ájn diede gåk sjaddá, valla dálla juo vuojnnep li stuorra dárbo. Dát beraj luluj dagu duodjeskåvllån sjaddat, dættot Urheim.

– Na majt de dån sáva?

– Mån sávav duodjebagádalle le dánna sajen stuoves fálaldahkan. Mån árvvedav dat la biednikgatjálvis, ja mån lidjiv sávvat dát lij dalá juo tjoavdeduvvat, javllá Urheim.

– La buorre gå vijmak la dal jåhtuj boahtám. Dáv lip vuorddám guhkes ájgev, javllá vas kurssaoassálasste, May-Judith Haukeland Amundsen.

Gulldal ålles ássjev dánna.