Store barggai NRK:as 1974 rájes ja lei hoavdan maid NRK Sáme Radios 80-logus.
NRK-Sámi ođasredaktevra Rávdna Buljo Gaup atná stuorra morašin go Store lea vádjolan:
– Mii gulaimet ahte son lei buohccán ja dat lea álohii hui surgat oažžut jápmasága, ja erenoamážit go dat lea nu lahka min, min iežamet olmmoš. Son han lei sámi journalistta, son lei maid Sáme Radio jođihan máŋggaid jagiid.
Nu ahte go dakkár olbmot vádjolit mat leat min nu lahka, almmolaš olbmot , dat lea hui váivi, ja dat ii leat somás diehtu. Min jurdagat mannet dál su bearrašii ja váldit oasi sin morrašis.
Beroštii erenoamážit Barentsguovllu bargguin
Arne Store barggai guhkit áiggi NRK báikkálaš kantuvrras Girkonjárggas ja beroštii erenoamážit Barentsguovllu bargguin mat galge gullot ja oidnot NRK-sáddagiin, muittaša NRK-Sámi ođasredaktevra Rávdna Buljo Gaup.
– Arne han lei dakkár journalista mii erenoamážit jurddašii Barentsperspektiivva, dan ahte mii orrut dakkár guovllus mii fátmmasta máŋga riikkaálbmoga, ja son iežas journalistihkas válddii vuhtii dan.
Muittuhii maid dan ahte mii orrut dakkár guovllus ja sin áššit gusket maid midjiide. Ja erenoamážit son gozihii dieđus Ruošša beale dili, dadjá Buljo Gaup.