Rabadettiin dán jagi Riddu Riđđu festivála, de almmuhii kulturministár Trond Giske ahte dát festivala nannejuvvo ja oažžu nu gohčoduvvon "knutepunktfestivala stáhtusa".
Sámedikki mielas lea buorre go Riddu Riđu lágideaddjit leat nagodan juksát dákkár dási festiválii.
Ilolaš diehtu
Ráđđelahttu, Vibeke Larsen, čevllohallá dál Riddu Riđu lágideaddjiiguin. Son ii oppa eahpit ge ahte festivala dál ovdána issorasat:
– Illubeaivin dat ferte gohčodit ievttáža ja mun hálidan sávvat lihku lágideaddjiide. Dás dat han lea sis 17-jagi astoáiggebargu duogábealde, lohká Larsen.
"Knutepunkt status" mearkkaša ahte Riddu Riđđu lea almmolaččat dohkkehuvvon Norgga festivalaid ovddemuččaid searvái iežas suorggis, ja lea dalle sihkkaraston jahkásaš stáhtadoarjaga fidnet.
Váikkuheaddji festivala
Larsen rámida maiddái Kulturministára, ja doaivu Sámediggi leamaš mielde váikkuheamen dán positiivvalaš mearrádussii mii dál lea boahtán ráđđehusas.
– Ilolaš diehtu Giskes mearkkaša ahte festivala dál sáhttá ovdánahttot nu go leamaš ulbmil, namalassii šaddat nana váikkuheaddji riikkaidgaskasaš festivalan. Riddu Riđđu han lea álgoálbmot festivála man birre dihtet juo viidát máilmmis, ja go dál oažžugoahtá stáhtadoarjaga, de han sáhttet miellagiddevaš vejolašvuođat rahpasaddat, lohká Larsen.