- Givssidit bargiid

- Mun dovdagohten lossadin bargodili juo 2004:s. Dalle orui  nu ahte hoavda jo measta álggii oaguhit mu ja mu barggu. 

Dan lohká Nuorta- Finnmárkku boazodoallokántuvrra  bargi iežas hoavdda birra,  gii lea Kárášjoga boazodoallo ágronoma.

Bargi ii hálit namas almmuhit amas ášši gárta nu lossadin sutnje.

GULDAL: Boazodoallohálddahusa bargodilli

- Jođiheaddji návccahuhttá

- Áiggi mielde lea jođiheaddji eambbo ja eambbo spiehkastaddan, ja su jođihanvuohki lea šaddan nu ahte mun in njulgestaga nákce šat bargui álgit.

Manai oahpu gazzat

Dan dihte válddii son studerenpermišuvnna 2006:s, dainna jáhkuin ahte bargodilli buorranivčče dan botta go lea eret. Son čálii de reivve bajimushovdii ja departementii váttisvuođaid birra, muhto dan rájes vearránii dilli.

Su dieđu vuođul de eai guorahallan váttisvuođaid, eambbo go jerrojuvvoje hoavddas, gii šiittii buot čuoččuhusaid.

Earát maid buohccin

Dan rájes leat vel guokte eará bargi dieđihuvvon buohccin bargodili geažil, oaivvida son.  Nubbi lea Kárášjogas ja nubbi gis boazodoallohálddáhusa váldokántuvrras Álttás.

Soai maid čuoččuheaba hoavddaid bargovuogi čuohcat nu garrasit ahte eaba gáro bargui.

Ii jietnat maidege

Boazodoallohálddáhus ii hálit maidege kommenteret dán ášši birra Sámi Radioi.

Dát golmmas leat geahččalan iežaset bargiidorganisašuvnna bokte čoavdit ášši, muhto sin mielas lei dilálašvuohta nu váttis ahte organisašuvnna barggiidovddasteaddji geassádii ja guđii ámmáhá.

Bargi ii jáhke iežaset máhccat ruovttoluotta bargguide, ovdal go juoga dahkko dilliin.