Finnmárkku fylkkamánni lea ožžon 27 cealkámuša Goahteluobbala guovllu gáhttenárvalussii. Dáin cealkámušain 11 leat gáhttema vuostá, guđasges dorjot dan.
Earret eará Norgga Boazosápmelaččaid Riikkasearvi doarju guovllu gáhttema. NBR deattuha goitge, ahte guovllu gáhtten ii berre hehttet boazodoalu geavaheamis eatnamiid.
– Ovddalgihtii galgá čielgasit boahtit ovdan, guđeláhkai guovllu geavaheapmi rievdá. Guovllu geavaheami ektui galget biddjot čielga eavttut, vai boazodoallu beassá boahtteáiggisge ávkkástallat guovllu, NBR jođiheaddji Nils Henrik Sara deattuha.
GULDAL:
Finnmárkku fylkkamánni lea ráhkadan árvalusa ásahit Goahteluobbala gáhttenguovllus, Guovdageainnu suohkanis. Árvalusas leat guokte molssaeavttu, juogo ásahit Goahteluobbala álbmotmeahccin dahje Muvrrešábi eanagáhttenguovlus. NBR doarju Muvrrešábi eanagáhttenguovllu, muhto gáibida, ahte boazodoallu galgá leat mielde guovllu hálddašeamis ja ráđđeaddi orgánas.
– Dainna lágiin sii olahit eanemusat ovttasbarggu, jus nu šattas boahtteáiggis, Sara čilge.
Finnmárkku fylkkamánni árvala gáhttet 23 eará jeaggeguovllu Finnmárkkus Goahteluobbala guovllu lassin. Dáid áššiid ektui ii leat vel leamaš gulaskuddanáigemearri. NBR oaivvilda, ahte go juo leat nie máŋga birasgáhttenproseassa oktanaga jođus, de lea dárbu dutkat, mo gáhtten váikkuha boazodollui.
– Dálá hálddašanvuoigádagas jáhkket dušše dutkiide. Danin sii gáibidit, ahte ášši guorahallo, Sara čilge.
Finnmárkku fylkkamánni čállá Goahteluobbala guovllu gáhttemis ávžžuhusa Luondduhálddašandirektoráhttii, mii fas čállá ávžžuhusa Birasgáhttendepartementii. Dan maŋŋá meannudages ráđđehus guovllu birasgáhttenplána, ovdalgo gonagas stáhtaráđis mearrida áššis loahpalaččat.
