Báikkálaš bargolávdegotti eanetlohku oaivvilda Finnmárkku fylkkamánni juo sihkkarastán dan, ahte Anárjoga álbmotmeahcci viiddiduvvo. Fylkkamánni sáhttá liikká ovddidit árvalusas ráđđehussii, vaikko vel bargolávdegoddi ii dáhtoge viiddidit álbmotmeahci.
Kárášjoga gieldda ovddasteaddji, Solveig Boine Nikkinen, imaštallá eiseválddiid bargovuogi.
– Bargolávdegottis lea maiddái fylkkamánni olmmoš. Fylkkamánni sáhttá goitge buktit guokte árvalusa. Dat orru hui ártegis vuohkki Solveig Boine Nikkinen mielas.
GULDAL:
Solveig Boine Nikkinen orru dušše moadde kilomehtera eret guovllus, man Finnmárkku filkkamánni dáhtošii oalát ráfáidahttit. Solveig bargá sávzzaiguin mánnávuođa ruovttustis Maridalenis, Anárjoh siste, Nuorta-Finnmárkkus.
Viiddes guovlu
Stuorra oassi Gošjoh- ja Anárjohleagis šaddá Anárjoga álbmotmehcci siskkobeallai, jus fylkkamánni árvalus čađahuvvo.
Jeagge- ja beahcevuovdeguovlu, man fylkkamánni árvala ráfáidahttit lea oktiibuot 624 km2 viidosaš. Dálá álbmotmeahcci lea oktiibuot 1.409 km2 viidosaš.
– Hehtte báikki olbmuid
Solveig Boine Nikkinen oaivvilda dán árvalusa hehttet báikki olbmuid geavaheames guovllu luondduriggodagaid.
– Son ii beasa šat geavahit dáid guovlluid nugo lea hárjánan. Sutnje lea maid hui dehálaš, ahte beassá iežas maŋisboahttiid váldit mielde guovlui, vai siige oainnášedje dán guovllu ja oahpašedje, mo luonddu galgá geavahit ja gáhttet, Boine Nikkinen muitala.
Ballá vuovdedoalus
Fylkkamánni ovddasteaddji, Jostein Fløgstad, lohká iežaset guhká juo diehttán báikki olbmuid oainnu dán áššis.
– Ruvkedoaimmat ja vuovdedoallu leat stuorra áittan guovlui. Danin sii árvalit viiddidit álbmotmeahcci, Fløgstad čilge.
– Illá vuhtto luodda
Bargolávdegoddi lei dán vahkus geahčadeamen árvaluvvon luonddugáhttenguovllu. Áidna luottat leat šaddan stáhta vuovdedoaimmain Basevuovddis, mii lea dálá álbmotmeahccis.
Solveig oaivvildage guovllu sámiid bures gáhtten guovllu.
– Sii leat gáhtten generašuvnnaid dáid eatnamiid. Dannehan leage dát guovlu nu menddo čáppat ja illá oppa oidnoge, ahte sin máttuhat leat geavahan dáid guovlluid, Solveig lohká.
Sihke báikkálaš bargolávdegotti ja Fylkkamánni árvalus sáddejuvvojit gulaskuddamii ja viidásut ráđđehussii.