Duorastaga oaččui sámi artista Mari Boine Norgga deháleamos kulturbálkkašumi, man gohčodit Anders Jahre Kulturbálkkašupmin, mii lea 500 000 ruvnnu sturrosaš bálkkašupmi.
Ovddeš kulturministtar ja Anders Jahre Kulturbálkkašumi árvvoštallan-lávdegotti jođiheaddji Åse Kleveland dajai ná Boine birra:
– Mari Boine lea čájehan ahte doaresbeal báikkiinge sáhttet máilbmenásttit riegádit. Norggas ii gávdno nubbi artista guhte lea seamma beakkán miehtá máilbmi go Boine, lohká Kleveland.
GULDAL:
(Artihkal joatká vuolabeal gova)
Njuorrasan
Mari Boine lei nu njuorrasan gudnejahtedettiin ja rámidettiin su ahte illá sáhtii hállat go bálkkašumi lei ožžon.
– Lea hirbmat stuorra gudni ja dat movttiidahttá. Leamaš guhkes luodda, lean bargan máŋgalot jagi dál. Lea somá diehtit ahte talenttat eai boađe dušše gávpogiin, dadjá Boine.
Oktiibuot lea bálkkašupmi milliovnna norgga ruvnnu ja Boine juogada dan Espen Giljanein, guhte ges lea mangalotjagi ángiruššan balleahttadánsuma ovddas.
Bálkkašupmi geigejuvvui Den gamle Logenis, kulturviesus Oslo gávpotguovddážis mii eanaš geavahuvvo dákkár allaárvosaš doaluide.
Gonagas maiddái lei doppe
Viessu lei áibbas dievva ja gussiid gaskkas ledje earret eará Gonagas Harald, ovddeš stáhtaministtar Kjell Magne Bondevik, sámedikki ráđ đelahttu Jørn Are Gaski ja sámi ja dáža kulturbargit ja maid olu eará sámit ja dážat geat háliidedje gudnejahttit bálkkašumi vuoitiid.