Hovudkjelda til drikkevatn i Sogndal kommune er no så låg at innbyggarane har fått melding frå kommunen om å avgrense vassforbruket sitt.
Basert på utrekningar meiner kommunen rett og slett at vassforsyninga kan gå tom.
Lerumfabrikken på Kaupanger har difor sett i gang tiltak for å avgrense forbruket. Til vanleg nyttar dei i snitt 500.000 liter vatn om dagen.
– I verste fall vil vi ikkje ha vatn til reinhald av frukt eller til produkta, seier administrerande direktør i Lerum, Stein Klakegg.
Måndag skal dei ha krisemøte med kommunen.
Det var Sogn Avis som først skreiv om saka.
Kan bli tomt til våren
Nedbørsmengdene i store delar av Vestland er 90 prosent lågare enn normalt, noko som har gått utover straumprisar, laksefiske og beitesesongen.
Likevel har det tørre vêret gitt ein uvanleg god fruktsesong.
I Sogndal har kommunen bedt innbyggarane om å droppe vatning av plen, vask av vindauge, bil og liknande.
– På bakgrunn av dei utrekningane vi har gjort har vi valt å oppmode innbyggarane om å redusere forbruket, seier avdelingsleiar i vatn og avløp i kommunen, Gjert Dahl.
Eit liknande varsel kom i august.
– Vi såg at effekten av varselet hadde minka, så vi sende eit nytt varsel med skarpare ordlyd, seier Dahl.
Vassverkeigar sit med ansvaret
Det er vassverkeigarar som er ansvarlege for forsyninga av drikkevatn. Ofte er det kommunane sjølv som eig vassverka dei nyttar.
I Oslo har Mattilsynet har pålagt kommunen om å finne ei reservevasskjelde.
Det var i samband med dette arbeidet at byrådet i sommar vart felt av Raudt.
Dei siste åra har Mattilsynet arbeidde med leveringssikkerheit og spurt vassverka korleis dei vil levere drikkevatn i situasjonar med vassmangel eller forureining.
– Uansett kva som hender skal det vere eit system på plass som gjer at dei klarer å levere drikkevatn. Her finst det ulike løysingar, men det skal vere ein beredskapsplan på plass, seier Grete Mollan Breisnes, som er seniorinspektør i Mattilsynet.