Stadig fleire nordmenn er bekymra for tap av norsk natur

Truls Gulowsen, leiar for Naturvernforbundet

Trenden i desse tala stemmer med vår oppfatning, og eg trur den siste tidas hyttebygging, vindkraftutbygging og svært store motorvegar for 110 har gjeve det norske folk ein ganske brå oppvåkningseffekt om at ting ikkje heilt er som dei trudde det var med norsk natur. Solid arbeid frå NRK med hav, skog og oppsynsmannen har nok også bidratt, og eg håpar parti og politikarar no også vil endre politikk i tråd med folkemeininga og innføre ein strengare naturpolitikk framfor å tvihalde på gamle mytar om at utvikling krev nedbygging.

Marte Mjøs Persen (Ap), stortingsrepresentant

Eg forstår godt bekymringa som kjem fram i undersøkinga, og delar den bekymringa sjølv. Tap av biologisk mangfald er ein av dei største miljøutfordringane i dag, i tillegg til klimaendringane. Arbeidarpartiet meiner at ein berekraftig bruk av økosystema er avgjerande for å førebygge klimaendringane.

Olve Grotle (H), stortingsrepresentant

Det sterke fokuset på den globale natur- og klimakrisa, gjer det naturleg at stadig fleire meiner det blir bygt ned for mykje natur. Det viser at vi er i stand til å ta inn over oss vår tids store utfordring. Samtidig er det viktig med faktabaserte og kloke vurderingar når det gjeld bruk og endring av naturen, her medrekna avvegingane mellom viktige natur- og klimaomsyn og behovet livskraftige lokalsamfunn og næringsliv har til areal. I denne vurderinga høyrer det òg med at omstilling til det grøne skiftet krev bruk naturressursar, anten vi snakkar om fornybar energi, mineral eller andre ting.

Alfred Bjørlo (V), stortingsrepresentant

Eg er glad for at det store fleirtalet av nordmenn no slår alarm om den omfattande og ukontrollerte nedbygginga av natur landet rundt. Venstre meiner tida er inne til å «trekke i nødbremsa» på vegner av norsk natur – mellom anna ved å forby all hogst av gammalskog/ naturskog, meir vern av natur på land og til havs, og stoppe regjeringa sine planar om å gå laus på havdjupet også med mineralutvinning til havs. I denne saka er dei store partia – Ap, Høgre, Frp og Sp – rett og slett på kollisjonskurs både med Venstre og folk flest.

Jenny Følling (Sp), ordførar i Sunnfjord

Eg trur at den auka bekymringa blant nordmenn kan henge saman med at det er auka merksemd og fokus på nedbygging av sårbar natur.

Over tid har den største nedbygginga av sårbar natur skjedd i pressområda i kring dei store byane, og utbygging av firefelts motorvegar parallelt med jernbaneutbygging i sentrale strøk. Det har ført til enorme inngrep i naturen.

Då er det viktig at ein set inn innsatsen der og ikkje går laus på område det er for lite aktivitet.

Per Skorge, Noregs Skogeierforbund

Nedbygging av natur gir store klimautslepp og i tillegg blir det mindre tilgang på klima- og miljøvennlege trematerialer. Om lag 6 % av Noregs årlege klimautslepp kjem frå nedbygging av skog og annan natur.

Det er avgjerande å redusere nedbygginga av natur. Allereie nedbygde areal må unyttes betre enn i dag. Dersom det ut frå samfunnsomsyn må byggjast ned skog, meiner vi det må skje ein tilsvarande påskoging på gjengroingsarealer. Dette kan skje på ein måte som gir ein variert skog.

Bjørnar Skjæran (Ap), stortingsrepresentant

Det er viktig å redusere nedbygging, særleg av matjord, men også av naturområde av viktig nasjonal og regional betydning. Samtidig vil eg ta avstand frå utsegnene frå Alfred Bjørlo, der han omtalar norske lokalpolitikarar på ein nedsettande måte.