Slik vil dei løyse eggknipa i Noreg

Eggmangel som kan vare heilt til påske har fått omelett-glade nordmenn til å skjelve.

No tar Nortura, som har ansvar for eggmarknaden i Noreg, fleire grep for å løyse knipa:

• Dei hentar tilbake produsentar som er stilt i bero
• Dei ber regjeringa om å innføre lågare tollsatsar
• Dei oppmuntrar til å få fleire bønder på bana

I sum håpar dei at tiltaka vil sørgje for fleire egg i butikkhyllene frå slutten av februar.

Eggmangel er ikkje eit nytt fenomen.

I 2004 vart det muntert under spørjetimen på Stortinget då Lars Sponheim svarte på kva han ville gjere for å unngå alvorleg eggmangel til påske.

– Kvar mann si høne, kvitterte han.

Hentar tilbake produsentar

Sidan mai i fjor har nordmenn opplevd tomme og halvtomme egghyller i butikkane.

Bakgrunnen er svak krone og stor etterspurnad i Europa på grunn av sjukdomsutbrot. Summen gjer at fleire norske egg har hamna på kontinentet.

Men for nokre månadar sidan var situasjon var heilt annleis.

Då gjorde overproduksjon av egg at Nortura «kjøpte ut» 13 produsentar.

Eggprodusent Bjørn Petter Rygg meiner at Nortura bør hente fleire av dei «kvilande» bøndene tilbake i produksjon.

– Dei bør få dei på bana igjen, seier produsenten frå Hyen.

Og det har Nortura no lytta til.

– Vi har henta dei fleste tilbake i produksjon, men det vil ta litt tid før vi ser effekten av det. Hønene treng litt tid før dei byrjar å verpe, seier konserndirektør Kjell S. Rakkenes i Nortura.

Vil ha lågare toll

På toppen har Nortura denne veka sendt brev til Landbruksdepartementet, der dei ber om lågare tollsatsar på heile egg.

– Vi håpar at dette vil gjere det enklare for industrien å importere denne innsatsfaktoren sjølv, seier Rakkenes.

Landbruksminister Geir Pollestad (Sp) er tydeleg på at Nortura skal prioritere norske egg i butikkane.

– Brevet skal vi vurdere og raskt gje eit svar på. Industrien skal ta dei egga som blir importert, seier Pollestad.

– Vi kan trenge fleire bønder

Det er ikkje berre i Europa som skrik etter egg, også her heime har nordmenn blitt meir opptatt av å ete egg.

Kritikarar har peike på kolesterol-verdiane, medan tilhengarane meiner egg gjev alle dei viktige næringsstoffane utanom C-vitamin.

Seinare år har forsking vist at egg ikkje er så dårleg for kolesterolet likevel.

– Totalt sett fekk deltakarane som åt tre heile egg kvar dag i seg meir vitamin, mineral og andre viktige næringsstoff enn dei andre deltangane, seier ei stor undersøking i USA.

I Noreg auka etterspurnaden med 2 prosent i fjor.

– Held auka fram, så vil vi trenge fleire bønder i Noreg. Noko som er positivt for landbruket, seier konserndirektøren i Nortura.