– Dei etterlatne kjenner på djup sorg, fortviling og sinne etter å ha mista si høgt elska mor, dotter og syster, Marianne Amundsen, skriv bistandsadvokaten til familien, May Britt Løvik i ei pressemelding.
Det var måndag førre veke at kvinna blei drepen i eit knivangrep på Nav Årstad i Bergen. Saman med ein anna kollega, vart Amundsen frakta til Haukeland universitetssjukehus.
Ho døydde av skadane, medan den kvinnelege kollegaen fekk lettare skader.
Amundsen vart 57 år gamal. Ho var avdelingsleiar ved kontoret på Danmarks plass.
– Dei etterlatne treng ro og rom for å sørge, og ber om respekt for det, skriv Løvik.
– Ho var ein flott leiar som vi kjem til å sakne. Ho har gjort ein kjempejobb for Nav i mange år, sa Nav-direktør i Vestland, Anne Kverneland Bogsnes til NRK i førre veke.
Skriven ut frå sjukehus
Kvinna som vart skadd i angrepet, er 29 år gamle Ida Aulin. I pressemeldinga frå bistandsadvokaten kjem det fram at ho no er skriven ut frå sjukehus.
– Ho er sterkt medteken som følge av skader og av hendinga. Ho er også tungt prega av at ein nær og kjær kollega er riven vekk, skriv Løvik.
Aulin får hjelp av kriseteam og blir også vareteken av næraste familie.
Skjedde på samtalerom
Angrepet skjedde på eit samtalerom der den no drapssikta gjerningsmannen hadde møteavtale med dei Nav-tilsette kl. 10.00 førre måndag.
Få minutt etter vart politiet varsla om angrepet.
Gjerningsmannen er ein norsk statsborgar (39). Han er fengsla i fire veker, sikta for drap og grov kroppsskade.
Han vart pågripen av politiet inne på Nav-kontoret. Politiet har beslaglagt ein kniv dei meiner er brukt i drapshandlinga.
- Les også: