I Eindhoven i Nederland ligg det som kan sjå ut som ei stor steinblokk med vindauge og dører. Dette er Elize Lutz og Harrie Dekkers nye heim.
Huset er 94 kvadrat med to soverom. Det kan sjå ut som eit naturleg betonghus, men dette huset er laga med ein 3D-printar i ein fabrikk like ved. Enkelte stader har prentefeil laga særeigne detaljar.
Paret skal leige bustaden i eit halvt år.
– Det er spesielt. Forma er spesielt uvanleg, og då eg såg det for første gong minte det meg om noko eg drøymde om då eg var liten, seier Lutz til nyheitsbyrået AP.
Miljøvennleg byggemåte
Men sjølv om dette huset er spesielt og uvanleg i dag, kan dette bli ein byggeteknologi for framtida i Nederland. Dei må bygge hundretusenvis av nye bustader det neste tiåret for å busette ei veksande befolkning.
Professor Theo Salet ved Eindhoven tekniske universitet jobbar med 3D-printing. Han meiner dette er ein meir miljøvennleg måte å bygge hus på fordi ein treng mindre byggemateriale for å bygge, og det blir mindre svinn.
– Det handlar om berekraft fordi vi kuttar ned på mengda betong vi brukar. Her lagar vi berre det vi treng, seier han.
Dette er langt frå det første huset som er laga på denne måten. I 2014 bygde eit kinesisk selskap ti hus på 24 timar ved hjelp av teknologien. Også India har fått sitt første 3D-printa hus denne veka. Også der ser dei på slike hus som ei løysing for å gi fleire tak over hovudet, melder Reuters.
I USA er det fleire oppstartsbedrifter som jobbar med å lage 3D-hus for massemarknaden.
Ein teknikk for framtida
Huset i Eindhoven er bygd av 24 element som blei printa på fabrikken. Så blei delane frakta til staden der huset står, og sett saman der. Huset skal vere det første av sitt slag i Europa som er godkjent for bustadformål.
Byggeprosjektet er eit samarbeid mellom kommunen, universitetet og lokale bedrifter i byggebransjen.
Planen er at dei i første omgang skal bygge fem hus, der dei finpussar på teknikken for kvart hus. I framtida skal husa også kunne ha fleire etasjar.
Salet meiner dette kan endre måten hus blir designa og produsert på.
– Dersom du spør meg om vi kan lage ein million slike hus, så er svaret nei. Men vi kan bruke teknologien som ein del av eit hus, saman med andre materiale, som for eksempel trevirke, seier han til AP.
- Les:
- Les:
Dekkers har lagt merke til at huset er godt isolert. Og det er bra, både når han skal høyre på musikk, eller når han berre vil nyte stilla heime.
– Det gir ei veldig god kjensle. Når du er inne, høyrer du ikkje noko frå utsida, seier han.
- Les:
- Les: