Tolv gutar og fotballtrenaren deira var fanga inne i grotta i heile 19 dagar. Heile verda hadde auga retta mot redningsaksjonen og følgde utviklinga time for time.
Får møte representantar frå spesialstyrken
I den thailandske hovudstaden Bangkok kan besøkjande no mellom anna sjå utstyret som vart brukt i redningsarbeidet og lappane som vart skrive av gutane som helsing til familiane deira.
Det er også utstilt notat som redningsmannskapet skreiv under førebuingane.
Utstillinga vart opna 22. august i Siam i Bangkok, og er i regi av det thailandske kulturdepartementet. Det var visestatsminister Wissanu Krea-ngam som opna utstillinga, som er open til 9. september.
På utstillinga kan ein møte og snakke med representantar frå den thailandske spesialstyrken Thai Navy Seals, som deltok i det svært kompliserte redningsarbeidet.
- Les også:
- Les også:
Utstillinga skal flyttast rundt
Fotballaget og trenaren var på utflukt i Tham Luang-grotta då dei vart fanga inne i grottegangen grunna kraftig monsunregn som plutseleg strøymde inn. Dei vart funne fire kilometer inne i grottesystemet etter ein storstilt leiteaksjon.
10. juli i år kom meldinga om at alle var berga ut i live. I utstillinga kan ein mellom anna sjå dykkarmaskene som vart brukt, dykkardraktene, sambandsutstyret, lyktene og oksygentankane.
Utstillinga, som er delt inn i totalt sju soner, skal visast fram i alle dei fire regionane i Thailand.