– Det var sjokkerande at det skjedde, at politiet var her og at ungdommar på vår alder var sur og sint på politiet.
Det seier to ungdommar til NRK etter politiet to gongar på ei veke rykka ut til kjøpesenteret Sirkus Shopping i Trondheim.
Her brukar ungdommar senteret som opphaldsstad på fritida, og fleire klarar ikkje å oppføre seg.
Fem ungdommar har blitt utestengde frå kjøpesenteret i eit år. Av dei har to blitt meldt til politiet.
Butikktilsette har i etterkant forklart at de blei utsett for slag og spark.
Men kven er desse ungdommane? Og kvifor oppfører dei seg slik?
– Toler ganske lite
Ungdommar frå 12 år og oppover brukar kjøpesenter for å møtast.
Det fortel leiar for uteeininga i Trondheim kommune, Camilla Wright.
– Det er ungdommar frå alle samfunnslag. Det er ungdommar som prøver å finne ein plass å vere, ein plass å høyre til.
Fleire stader i landet brukar ungdommar kjøpesenter til nettopp dette.
Wright fortel at ungdommar hang meir på kjøpesenter og andre offentlege stader på begynninga av 2000-talet. Etter fleire år med «generasjon prestasjon», dataspeling og pandemi, er ungdommane no tilbake på kjøpesentera.
– Då blir me utruleg sjokkert. Me er ein vaksengenerasjon som toler ganske lite. Frustrasjonen blir ganske stor, veldig fort, seier ho.
Alti Tasta i Stavanger, Bystasjonen i Bergen og Jessheim Storsenter er blant kjøpesentera i landet som har opplevd liknande utfordringar som på senteret i Trondheim.
Dei opplev likevel at dei fleste ungdommane som no heng på kjøpesentera, oppfører seg.
– Men dessverre kan det av og til vere enkelte som øydelegg for andre med å lage støy og ikkje oppføre seg, fortel senterleiaren i Stavanger, Birte Wiinberg.
Vil skape drama
NRK har valt å la de to ungdommane som møtes på Sirkus Shopping vere anonyme.
– Me heng her fordi me ikkje har så mykje anna å gjere og fordi det er kjedeleg å vere heime, forklarar 15-åringane.
Dei kjenner til gjengane som ikkje oppførte seg på kjøpesenteret.
– Dei vil ha merksemd og dei vil at det skal skje noko. Sidan det ikkje skjer så mykje til dagleg, så vil dei skape litt drama.
15-åringane trur det ikkje er tilfeldig at det er nettopp her det skjer.
På kjøpesenteret er det fleire folk til stades. Det betyr fleire tilskodarar og fleire involverte.
For å få meir merksemd publiserer ungdommane videoar frå hendingane på TikTok.
– Det blir delt for at fleire skal sjå det. Det er jo ikkje noko anna grunn for å legge det ut enn for å gå viral då. For å få masse views.
Naturleg variasjon
Leiar for førebyggande avsnitt på Sentrum politistasjon, Jan Erik Mihle, fortel at denne typen oppførsel er ein del av den naturlege variasjonen i ungdomsgruppene i byen.
Dette til trass for fleire episodar same stad i løpet av ei veke.
Det er strøymingar som kjem og går.
– Sånn har det vore i alle år. Det er impulsivt og lite planlagt. Det er inga fare for oppblomstring, seier Mihle.
På begynninga av 2000-talet var ungdommane meir ute, fortel Camilla Wright i uteseksjonen i kommunen.
– Og så plutseleg er det tilbake, og me vaksne klarar ikkje heilt å følgje med. Og då blir me utruleg sjokkert.
– Dette får me til saman, men me må inkludere og ikkje stenge ute, seier Wright.
Samarbeider for å førebygge
Senterleiar ved Sirkus Shopping i Trondheim, Trine Foosnæs, ynskjer heller ikkje å ekskludere ungdommane, men har sett seg nøydd til å gjere det no.
– Me ser ikkje på det som eit veldig stort problem. Det er nokre enkeltungdommar som har skapt utfordringar for oss, og som no er utestengde.
Ho håpar at ungdommar vil halde fram med å besøke kjøpesenteret og oppføre seg der.
Saman med andre kjøpesenter, vaktselskap, politiet og kommunen har dei laga ein strategi for å førebygge mot fleire slike hendingar.
– Det blir viktig å vere til stades og ha hyppigare kontakt med ungdommane, fortel senterleiaren.
No håpar dei tidleg å kunne identifisere kven det er som skapar utfordringar, slik at det slepp å kome konsekvensar for andre enn dei det gjeld.
– Kort sagt er det jo unødvendig at dei driv på sånn, berre for å få merksemd. Det finst andre ting dei kan halde på med, legg 15-åringane på Sirkus Shopping til.