Etter fleire klagar om råkøyring frå folk som ferdast på og ved Volhaugvegen, i nærleiken av ein skule i Verdal i Trøndelag, drog Utrykkingspolitiet (UP) i dag til staden for å halde fartskontroll.
– Det er ein gang og sykkelveg langs strekninga. Sjåførane vert målt like før dei kom inn i ei 40 sone med fotgjengarfelt over vegen. Dette er eit strekke som ikkje er så langt unna ein skule, seier Dag Ryen, gruppeleiar for UP i området.
Dagens kontroll vart starta like før barna ved skulen var ferdige for dagen. Målet med å ha kontrollen på dette tidspunktet var å kontrollere korleis folk køyrer der når barna ferdast langs vegen.
Strekket der sjåføren vart tatt i 127 km/t.
Foto: Eivind Aabakken / NRKTre personar vart meldte for høg fart i 60 sona. Den raskaste av sjåførane vart målt til 127 km/t like før skuleklokka ringde ut for dagen.
– Det er alt for høg hastigheit, seier Dag Ryen.
– Er det vanleg at de tar folk i over dobbelt så høg hastigheit som er lov på ei slik strekning?
– Nei, det er lenge imellom. Men vi har vore borte i tilsvarande hendingar før, svarar UP-leiaren.
Han oppfordrar dei som køyrer på denne måten om å i det minste tenkje på kva tid og stad dei vel å køyre så fort.
– For med den hastigheita der, så er det eit bevisst val, seier Ryen.
