– Det er tre skispor som går inn i skredet. Vi har kontroll på personane som har gått i desse skispora, seier operasjonsleiar Wenche Johnsen i Trøndelag politidistrikt til NRK.
Det vart omtalt som ein større redningsaksjon. Naudetatane rykte ut med Sar Queen, Norsk luftambulanse, brannvesen og hundeekvipasjar.
Skredet gjekk i Nonsfjellet, opplyste Andreas Nesheim i Hovudredningssentralen i Sør-Noreg til NRK like før kl. 15.30.
– Ikkje andre personar i skredområdet
Politiet har grunn til å tru at personane på skitur kan ha utløyst skredet.
– Vi har konkludert med at det ikkje er andre personar der. Det er stor skredfare, så det medfører også fare å sende bakkemannskap i søk, seier operasjonsleiaren.
Skiløparane skal ha stått på randoneeski. Dei var i to ulike grupper.
– Ein far og ein son er gjort greie for. Det var ein anna turgåar som ringde og varsla om skredet. Personen sette i verk overflatesøk med ein gong, fortel Johnsen til NRK.
Skiløparane tek seg no ned frå fjellet sjølv på ei tryggare rute, opplyser politiet til NRK.
Betydeleg fare for snøskred to stader i Noreg i helga
Dei fleste fjellområda i Noreg har gult nivå, altså moderat snøskredfare, fredag, laurdag og søndag. Som Trollheimen, kor Nonsfjellet ligg.
– Det som har skjedd fleire stader no, blant anna i Trollheimen, er årets første skikkelege oppvarming. Det har vore plussgrader fleire netter på rad. Då begynner det å gå skred i gamle, svake lag, seier Gustav Pless.
Han er vaktleiar i Snøskredvarslinga.
Det er greit å gå på tur i områda med moderat snøskredfare, så lenge du er varsam.
– I områder med moderat fare, er det veldig vanskeleg å seie når snøskreda går. Men det er mest sannsynleg at dei går på ettermiddagen og kvelden, seier Pless til NRK.
I Indre Troms og Jotunheimen er snøskredfaren betydeleg i helga, altså på raudt nivå.